ბოლნისში მომხდარ ინციდენტში ქართული ოცნების ერთ-ერთ ლიდერი, მამუკა მდინარაძე ნაციონალურ მოძრაობას ადანაშაულებს. მისი მტკიცებით, კონფლიქტი ფიზიკურ დაპირისპირებაში ენმ-ს "პროვოკაციული ქმედებებისა და ძალადობის" შედეგად გადაიზარდა. ამიტომ ის მხარდამჭერებს "მოთმინებისკენ", შსს-ს კი "მყისიერი რეაგირებისკენ" მოუწოდებს.

"გვესმის, რომ ძალიან რთულია მოითმინო „ნაციონალური მოძრაობის“ და მათი მოძალადე აქტივისტების ქმედებები, მსგავსი მასშტაბური პროვოკაციები და ძალადობის მცდელობები, თუმცა ჩვენ ვართ პასუხისმგებლიანი გუნდი და ყველა ტიპის პროვოკაციაზე მაქსიმალური თავშეკავება გვმართებს. [...]

სამართალდამცავი ორგანოებისგან ველით, რომ თითოეული ფაქტი გულდასმით იქნება შესწავლილი და ძალადობის ნებისმიერ გამოვლინებას ექნება მყისიერი რეაგირება", —განაცხადა.

ენმ-ს ვერსიის საპირწონედ, მდინარაძე ამბობს, რომ ოპოზიციის წევრები დაესხნენ მათ წევრებს თავს ხელკეტებითა და ქვებით და რამდენიმე დაშავებული საავადმყოფოშია გადაყვანილი.

"მაგალითისთვის, გუშინ, ნახიბულაში საარჩევნო პლაკატების გაკვრის დროს მათი პარტიული აქტივის მოქმედებები ამისკენ იყო მიმართული, შემდეგ ჩაიხანაში მიზანმიმართული პროვოკაცია ქართული ოცნების აქტივისტებთან, სადაც ფიზიკურ შეხლა-შემოხლასაც ჰქონდა ადგილი, თუმცა კონფლიქტის ესკალაცია ჩვენი, ქართული ოცნების და შემთხვევით არ ვუსვამ ამას ხაზს, შტაბის მიმდებარე ტერიტორიაზე მოხდა, სადაც ნაციონალური მოძრაობის აქტივისტები ხელკეტებით, ქვებით, მაგიდის გადატეხილი ფეხებით შეიარაღებულები დაესხნენ თავს ჩვენი გუნდის წევრებს, რის შედეგადაც ქართული ოცნების წარმომადგენლებმა მძიმე ფიზიკური დაზიანებები მიიღეს და კონფლიქტი უკვე ამის შემდეგ ხელჩართულ ჩხუბში გადაიზარდა. ჩვენი რამდენიმე აქტივისტი საავადმყოფოშია გადაყვანილი და მათ აქვთ დაზიანებები მიღებული", — აცხადებს მდინარაძე.

გუშინ, 27 სექტემბერს ბოლნისში ქართული ოცნებისა და ნაციონალური მოძრაობის წევრებს შორის დაპირისპირება მოხდა. ენმ-ს მხარდამჭერები და მათი მაჟორიტარობის კანდიდატი კახა ოქრიაშვილი ამტკიცებდნენ, რომ მათ ჩაიხანაში თავს დაესხნენ ოცნების მაჟორიტარობის კანდიდატის, გოგი მეშველიანის ძმა და მათი მხარდამჭერები. შეგახსენებთ, რომ აქამდე ოქრიაშვილი ბოლნისში ქართული ოცნების კანდიდატი იყო.

მეშველიანმა On.ge-სთან ეს ინფორმაცია უარყო. მისი თქმით, თავად ინციდენტში არ მონაწილეობდა, რადგან ბოლნისში არ იყო და მისი ძმა არათუ ვინმეს სცემდა, არამედ აშველებდა.

შინაგან საქმეთა სამინისტროს ინფორმაციით, საქმეზე გამოძიება სისხლის სამართლის კოდექსის 126-ე მუხლის პირველი პრიმა ნაწილის "ბ" ქვეპუნქტით მიმდინარეობს, რაც ჯგუფურ ძალადობას გულისხმობს.