გაეროს 75-ე გენერალურ ასამბლეაზე სიტყვით გამოსვლისას რუსეთის პრეზიდენტმა, ვლადიმერ პუტინმა ორგანიზაციის წევრებს მათი წარმოებული ვაქცინა შესთავაზა, რომელსაც მსოფლიოს სხვადასხვა ქვეყნის ჯანდაცვის წარმომადგენლები აკრიტიკებენ. პუტინის თქმით, კორონავირუსმა გვერდი არც გაეროს აუარა და ორგანიზაციის წევრები ინფიცირებული არიან, ამიტომ ის "მზად არის უფასოდ" დაეხმაროს მათ.

სიტყვით გამოსვლისას პუტინმა ხაზი გაუსვა, რომ რუსი ექიმების კვალიფიკაციით მათ შეძლეს მსოფლიოშ პირველი ვაქცინის დამზადება და ისინი წარმატებულად უმკლავდებიან ეპიდემიას.

ბოლო მონაცემებით, რუსეთში ინფიცირების მილიონზე მეტი შემთხვევაა დაფიქსირებული და ქვეყანა რიგით მეოთხეა ინფიცირებულთა საერთო რაოდენობით. რუსეთში კორონავირუსისგან გარდაიცვალა 20 000-ზე მეტი ადამიანი.

რაც შეეხება ვაქცინას, ის ჯანდაცვის მსოფლიო ორგანიზაციას არ უღიარებია. მეცნიერთა ჯგუფი ჟურნალში The Lancet გამოქვეყნებულ COVID-19-ის საწინააღმდეგო რუსული ვაქცინის კვლევის მონაცემებს აკრიტიკებს. ავტორთა მისამართით გამოქვეყნებულ ღია წერილში ისინი ცალსახად მიანიშნებენ, რომ სტატიაში გამოყენებული მონაცემები, შესაძლოა, კოპირებული იყოს. მათი განცხადებით, ნაშრომში მოყვანილი მონაცემები ჩაუშლელად არის მოწოდებული, რის გამოც რთულდება იმაზე მსჯელობა, თუ კონკრეტულად რა ფაქტობრივ მტკიცებულებას ეყრდნობა მიღებული შედეგები.

რუსული ვაქცინა რეკომბინანტულ ადენოვირუსულ ვაქცინას წარმოადგენს. ეს იმას ნიშნავს, რომ იგი ორგანიზმში შესაღწევად ჩვეულებრივი გაციების გამომწვევი ადენოვირუსების ჯგუფის წარმომადგენელს იყენებს. ამ უკანასკნელთან SARS-CoV-2-ის სპაიკ-ცილაა დაკავშირებული, რომელსაც იმუნიტეტი ამოიცნობს და მის წინააღმდეგ იმუნური პასუხის გამომუშავებას იწყებს.

გაიგეთ მეტი: