Facebook-მა რუსეთთან დაკავშირებული ქსელები წაშალა, რომელთა მიზანი სხვა ქვეყნის პოლიტიკაში ჩარევა იყო. სოციალური ქსელის გიგანტის განცხადებით, ამ სიაში მოხვდა საქართველოც.

"წავშალეთ სამი დამოუკიდებელი ქსელი, რომელიც ეწინააღმდეგებოდა ჩვენს პოლიტიკას არაავთენტურ ქცევაში უცხო ქვეყნების ან მთავრობის ჩართულობის შესახებ. ეს ქსელები რუსეთიდან იღებდა სათავეს", — წერია კომპანიის განცხადებაში.

ფეისბუქმა წაშალა 214 მომხმარებელი, 35 ფეისბუქგვერდი, 18 ჯგუფი და 34 ექაუნთი ინსტაგრამზე. კომპანიაში განმარტავენ, რომ თითოეულ ფეისბუქგვერდს დაახლოებით 8 500, ინსტაგრამის ანგარიშებს კი დაახლოებით 7 500 გამომწერი ჰყავდა. გარდა ამისა, თითოებულ ჯგუფში 9 500-მდე ადამიანი იყო გაწევრიანებული.

მათი განცხადებით, ეს ქსელი, პირველ რიგში, მიმართული იყო სირიასა და უკრაინაზე, ასევე, თურქეთზე, იაპონიაზე, სომხეთზე, საქართველოზე, ბელარუსზე და მოლდოვაზე. მათივე თქმით, ამ ქსელის საქმიანობის მცირე ნაწილი ორიენტირებული იყო დიდ ბრიტანეთზე და აშშ-ზე.

ფოტო: Faceboo

ფოტო: Faceboo

Facebook-ის განცხადებით, აგვისტოში წაშლილი რუსული ქსელის მსგავსად, ამ დაჯგუფების წევრებიც არაერთ ინტერნეტქსელში მუშაობდნენ და ცდილობდნენ დაექირავებინათ კონტრიბუტორები და მათი ისტორიები ახალი ამბების ორგანიზაციების საშუალებით გაევრცელებინათ.

"იმ ქსელს, რომელზეც ჩვენ დღეს ვისაუბრებთ, მიზანში მსოფლიოს მასშტაბით არაერთი ქვეყანა ჰყავდა ამოღებული და გლობალურად შეზღუდული მხარდაჭერა ჰქონდა.
აქტივობების დიდი ნაწილი მიმართული იყო ორ საკითხზე:

  1. ფიქტიური და თითქოს დამოუკიდებელი მედია ობიექტებისა და პერსონების შექმნა, რათა მათი კონტენტის გავრცელებაში შემთხვევითი ადამიანები ჩაერთოთ;
  2. ადამიანების მიწვევა ვებგვერდებზე, რომელთაც ისინი აკონტროლებდნენ", — წერია ფეისბუქის განცხადებაში.

ფოტო: Faceboo

კომპანიის განცხადებით, ყველა შემთხვევისას ამ ქმედებების უკან მდგომი პირები კოორდინირებულად მოქმედებდნენ და ისინი წერდნენ სხვადასხვა ენაზე. მათ შორის: ინგლისურად, უკრაინულად, რუსულად და არაბულად. ისინი ხშირად წერდნენ საქართველოს, სომხეთის, უკრაინიას და ბელარუსის შიდა პოლიტიკაზე, სირიის ომზე, აზიის რეგიონის გეოპოლიტიკურ პრობლემებსა და ნატოზე.

ფოტო: Faceboo

Facebook-ის განცხადებით, კვლევისას ვერ აღმოაჩინეს, რომ გაუქმებული ქსელები უშუალოდ 2020 წლის არჩევნებში ჩართვას ცდილობდნენ, მაგრამ ისინი დაკავშირებულნი არიან პირებთან, რომლებიც წარსულში აშშ-ს არჩვენებში ჩაერივნენ. მათ შორის 2016 წელს მოხმდარი გაჟონვის საქმის მონაწილეებთან.

"წარსულში ჩვენ ფეიკ კამპანიას ვაკვირდებოდით, რომელიც ჟურნალისტებსა და საზოგადოების წარმომადგენლების წინააღმდეგ იყო მიმართული, მათ შორის დაფიქსირდა დაჰაკვისა და ინფორმაციის გაჟონვის ფაქტები. ამ დროს ხდება კონფიდენციალური ინფორმაციის მოპარვა, ზოგჯერ მისით მანიპულირება, ამის შემდეგ კი მისი გავრცელება, რათა საზოგადოებრივ დებატებზე გავლენა მოახდინონ. ეს არის ერთ-ერთი საფრთხე, რომელზეც განსაკუთრებული ფოკუსი ამერიკაში ნოემბერში ჩასატარებელი არჩევნების წინ გვქონდა", — წერია კომპანიის განცხადებაში.

ფოტო: Facebook