ადამიანები, რომლებიც კორონავირუსის შეზღუდვების შედეგად დაზარალდნენ, შესაძლოა ზიანი აუნაზღაურდეთ, ამაზე მთავრობა მუშაობს. ამის შესახებ მთავრობის ადმინისტრაციის უფროსმა, ნათია მეზვრიშვილმა პალიტრანიუსის ეთერში განაცხადა.

"მაქსიმალურად ვცდილობთ, რომ იმ ადამიანებს, რომლებიც საჭირო შეზღუდვების შედეგად დაზარალდნენ, ზიანი აუნაზღაურდეთ და მეორე მხრივ გვაქვს არჩევნები და არ გვინდა ისეთი გადაწყვეტილებები მივიღოთ 31 ოქტომბრამდე. ამ ბალანსის დაცვას ვცდილობთ. თუმცა ამაზე ვმუშაობთ და ამ ადამიანებს უახლოეს პერიოდში ინფორმაციას მივაწვდით", — განაცხადა ნათია მეზვრიშვილმა.

მეზვრიშვილის თქმით, ასევე აუცილებელია მთავრობამ ბალანსი დაიჭიროს დაზარალებული მოქალაქეების დახმარებასა და წინასაარჩევნო პერიოდში კანონის დაცვას შორის.

20 ივლისიდან, ღია სივრცეში სოციალური ღონისძიებები, მათ შორის: ქორწილი, ნებისმიერი იუბილე, რიტუალური ღონისძიებები და ა.შ. ჩატარება, რომლებზე დამსწრეთა რეკომენდებული მაქსიმალური რაოდენობა 100 ადამიანით განისაზღვრებოდა, დასაშვები გახდა.