ექსპრეზიდენტმა მიხეილ სააკაშვილმა ტელეწამყვან ნანუკა ჟორჟოლიანს სუპერვარსკვლავი უწოდა და აღნიშნა, რომ ჟორჟოლიანი ნაციონალური მოძრაობისთვის დიდი შენაძენია.

"შემოგვიერთდა სუპერვარსკვლავი, ნანუკა ჟორჟოლიანი, რომელიც არის სუპერვარსკვლავი, არა მხოლოდ ტელესივრცის, არამედ, ზოგადად, შემოქმედებითი პროფესიების", — აღნიშნა მიხეილ სააკაშვილმა.

სამტრედია-წყალტუბოს მაჟორიტარულ ოლქში ნაციონალურმა მოძრაობამ გენერალ დევი ჭანკოტაძის კანდიდატურა ტელეწამყვან ნანუკა ჟორჟოლიანით ჩაანაცვლა.

როგორც პარტიის ლიდერი, გრიგოლ ვაშაძე განმარტავს, ქართული ოცნება ხშირად საუბრობს საქართველოს ხელისუფლების მიერ აგვისტოს ომის დაწყებაზე, დეზინფორმაციის გასაქარწყლებლად კი მათ ეროვნულ კამპანიაში დევი ჭანკოტაძის ჩართვა გადაწყვიტეს. მისი კანდიდატურა კი ჟორჟოლიანით ჩაანაცვლეს.

"მივიღეთ ეს გადაწყვეტილება, რომ ეროვნულ კამპანიაში ყველა რეგიონში ჩართული იყოს 2008 წლის რუსული სამხედრო აგრესიის მოგერიების ერთ-ერთი გმირი", — აღნიშნა ვაშაძემ ფორმულას ეთერში.

მისივე თქმით, ჭანკოტაძე პროპორციულ საარჩევნო სიაში იქნება.

დღეს, 23 სექტემბერს ერთიანმა ნაციონალურმა მოძრაობამ და გაერთიანებულმა ოპოზიცია — ძალა ერთობაშიამ მაჟორიტარი დეპუტატობის კანდიდატები დაასახელეს. კანდიდატებს შორის არ არიან რესპუბლიკური პარტიის წარმომადგენლები, რომლებიც გაერთიანებულ ოპოზიციას რამდენიმე დღის წინ შეუერთდნენ.

სრული სია ნახეთ აქ.