საზოგადოებრივი მაუწყებლის გენერალური დირექტორობა 11 კანდიდატს სურს. ასეთია განცხადების მიღების დასრულებამდე 1 დღით ადრე, 27 დეკემბრის მონაცემები. დირექტორობის მსურველებს შორის არიან ბაჩუკი ბახტაძე, რევაზ შალიბაშვილი, ზაალ ანჯაფარიძე, გიორგი ქავთარაძე, ვასილ მაღლაფერიძე, ნინო ზაუტაშვილი, გურამ ფალავანდიშვილი, ნიკოლოზ მჭედლიშვილი, თინათინ ბერძენიშვილი, დავით ცინცაძე და მანანა ღოღობერიძე.

კანდიდატებს შორის არიან მაუწყებლის მოქმედი თანამშრომლები - გენერალური დირექტორის მოვალეობის შემსრულებელი თინათინ ბერძენიშვილი და გადაცემა რეალური სივრცის წამყვანი ნინო ზაუტაშვილი.

მანანა ღოღობერიძე შპს ეტალონი მედიას მფლობელია და წლების განმავლლობაში გადაცემა ეტალონს ამზადებდა. ეს გადაცემა რამდენიმე წელი საზოგადოებრივი მაუწყებლის ეთერშიც გადიოდა. ახლა კი, სახელმწიფო უწყებებთან და მუნიციპალიტეტებთან თანამშრომლობს და მათ საინფორმაციო სააგენტოების მომსახურებას, სარეკლამო მომსახურებას ან მუნიციპალიტეტების მოსწავლეების ინტელექტ-ჩემპიონატში მონაწილეობას სთავაზობს.

გურამ ფალავანდიშვილი სხვადასხვა სატელევიზიო გადაცემების წამყვანად მუშაობდა. მან 2016 წლის საპარლამენტო არჩევნების დროს დემოკრატიული მოძრაობა - ერთიანი საქართველოს სიით მაჟორიტარ კანდიდატად იყარა კენჭი. მედიის განვითარების ფონდის კვლევის მიხედვით, ის გამოირჩევა ჰომოფობიური განცხადებებით.

კიდევ ერთი კანდიდატი ვასილ მაღლაფერიძეა, რომელიც საქართველოს ყოფილი პრემიერ-მინისტრის ბიძინა ივანიშვილის ოჯახის საკუთრებაში არსებულ ტელევიზიებში - GDS და TV9 განმავლობაში მუშაობდა. გარდა ამისა, ნაციონალური მოძრაობის ხელისუფლებაში ყოფნის დროს გუბერნატორის თანამდებობას იკავებდა.

რევაზ შალიბაშვილისა და დავით ცინცაძეს ერთხელ უკვე ჰქონდათ მცდეობა საზოგადოებრივი მაუწყებლის დირექტორის თანამდებობა დაეკავებინათ, თუმცა უშედეგოდ. ზაალ ანჯაფარიძეს კი სამეურვეო საბჭოს წევრობა სურდა.

გენერალური დირექტორის თანამდებობა მას შემდეგ გახდა ვაკანტური, რაც 21 ნოემბერს გიორგი ბარათაშვილმა თანამდებობა დატოვა.