მოძრაობა სირცხვილიას წევრებისა და სამოქალაქო აქტივისტების, გიგა მაქარაშვილის, ზუკა ბერძენიშვილისა და ირაკლი კაჭარავას საჩივარი ადამიანის უფლებათა ევროპულ სასამართლოში დაარეგისტრირეს. საჩივარი 2019 წლის 18 ნოემბერს აქციის დაშლისას აქციის მონაწილეების დაკავებას ეხება.

"სტრასბურგებში ვაფრინეთ ჩვენი ამბავი და 6 თვის თავზე საქმე სახელწოდებით: მაქარაშვილი/ბერძენიშვილი vs ქართული ოცნება წარმოებაში მიიღეს!... ბუნებრივია კომპენსაცია არ მოგვითხოვია, ჩვენივე გაუბედურებული ხალხის ჯიბიდან კაპიკს არ ავიღებთ", — დაწერა მაქარაშვილმა საკუთარ ფეისბუქგვერდზე.

ედუარდ მარიკაშვილის ინფორმაციით, რომელიც ორგანიზაცია საქართველოს დემოკრატიული ინიციატივის ადვკოტატია, კონკრეტული მოთხოვნა არის ის, რომ სასამართლომ აღიაროს შეკრების თავისუფლების დარღვევა.

გიგა მაქარაშვილი და ზუკა ბერძენიშვილი 18 ნოემბერს პარლამენტთან მიმდინარე აქციის დაშლისას დააკავეს. 21 ნოემბერს გიგა მაქარაშვილს, ირაკლი კაჭარავას და ზუკა ბერძენიშვილს პატიმრობა შეეფარდათ. მოსამართლის გადაწყვეტილებით, გიგა მაქარაშვილს 12 დღე, ირაკლი კაჭარავას 4 დღე, ზუკა ბერძენიშვილს კი 7 დღე დაეკისრათ.

26 ნოემბერს ზუკა ბერძენიშვილი პატიმრობიდან გაათავისუფლეს, 1 დეკემბერს კი მაქარაშვილმა დატოვა საპატიმრო დაწესებულება.