ტაჯიკი ბიზნესმენების გატაცებისა და მათთვის ფულის გამოძალვის ბრალდებით დაკავებული 4 პირიდან 3-ს აღკვეთის ღონისძიების სახით პატიმრობა განესაზღვრათ.

დაკავებულებს ბრალი თავისუფლების უკანონო აღკვეთაში, გამოძალვასა და იძულებაში ედებათ. დანაშაული 7-დან 10 წლამდე ვადით თავისუფლების აღკვეთას ითვალისწინებს.

გამოძიების ინფორმაციით, ბრალდებულებმა ტაჯიკ ბიზნესმენებს უკანონოდ აღუკვეთეს თავისუფლება და თანხის გამოძალვის მიზნით ფიზიკურად გაუსწორდნენ.

უწყებაში აცხადებენ, რომ მათ ნივთმტკიცებად ამოიღეს LEXUS GX მარკის ავტომობილი, CZ-ს მარკის 2 ცეცხლსასროლი იარაღი, ვაზნები, 2 აირის პისტოლეტი, ერთი ცალი დანა, ბეისბოლის 3 ხელკეტი და 68 900 დოლარი.

გამოძიება თავისუფლების უკანონო აღკვეთის, გამოძალვისა და იძულების საქმეზე სისხლის სამართლის კოდექსის 143-ე მუხლის მე-3 ნაწილის "ა" და "ე" ქვეპუნქტებით, 181-ე მუხლის მე-2 ნაწილის "ა" და "გ" ქვეპუნქტებით და 150-ე მუხლის მე-2 ნაწილის "ბ" ქვეპუნქტით მიმდინარეობს.