აზერბაიჯანის პრეზიდენტმა, ილჰამ ალიევმა განაცხადა, რომ თბილისმა საკუთარი ტერიტორიის გავლით სომხეთში იარაღის ტრანსპორტირება არ დაუშვა. მისივე თქმით, საქართველო მოიქცა როგორც საიმედო პარტნიორი და ამისათვის ის თბილისს მადლობას უხდის.

"მინდა ვთქვა, რომ ძალიან ვაფასებ საქართველოს მთავრობის მოქმედებებს შექმნილი ვითარების დროს. მთავრობათაშორისი კავშირები ორ ქვეყანას შორის ყოველდღე ძლიერდება და ბევრი მნიშვნელოვანი პროექტების რეალიზაცია ხდება", — განაცხადა ალიევმა სომხეთისთვის რუსეთიდან და სერბეთიდან იარაღის მიწოდებაზე საუბრისას.

ალიევი განმარტავს, რომ თბილისის გადაწყვეტილების გამო სომხეთს იარაღი სატრანსპორტო თვითმფრინავებით, კასპიის ქვეყნების გავლითა და საჰაერო სივრცით მიეწოდება.

მისივე განცხადებით, უახლოეს პერიოდში აზერბაიჯანის საგარეო საქმეთა მინისტრი საქართველოს ოფიციალური ვიზიტით ეწვევა.

"ეს მისი პირველი ვიზიტი იქნება საგარეო საქმეთა მინისტრის რანგში. პროგრამის ვიზიტი ახლა დგინდება. კიდევ ერთხელ მინდა ვთქვა, რომ ოფიციალურ თბილისსა და ბაქოს შორის მჭიდრო კავშირი აქვთ და ეს გაგრძელდება", — აცხადებს აზერბაიჯანის პრეზიდენტი.

12 ივლისს აზერბაიჯან-სომხეთზ შორის დაპირისპირება დაიწყო. კონფლიქტთან დაკავშირებით აზერბაიჯანულმა გამოცემამ სარედაქციო წერილი გამოაქვეყნა, სადაც ამტკიცებდა, რომ სომხეთს საბრძოლო იარაღი სერბეთმა საქართველოს გავლით მიაწოდა. ამ წერილს საქართველოს საგარეო საქმეთა სამინისტროში დეზინფორმაცია უწოდეს.