მიხეილ სააკაშვილის თქმით, თავის დროზე რეჯებ ტაიპ ერდოღანსაც აკრძალული ჰქონდა პოლიტიკური თანამდებობის დაკავება, მაგრამ როგორც კი მისმა პარტიამ არჩევნებში მოიგო, ერთ კვირაში ის ამკრძალავი კანონი გააუქმეს და ერდოღანი პრემიერმინისტრად დაინიშნა. ასე უპასუხა მან TV PIRVELI-ს ჟურნალისტის კითხვას, თუ რას ეტყოდა მათ, ვისაც სჯერა, სააკაშვილი იმიტომ არ ბრუნდება, რომ ციხეში წასვლის ეშინია.

"როგორც კი ერდოღანის პარტიამ არჩევნები მოიგო, შეიკრიბა პარლამენტი და ერთ კვირაში გააუქმეს ის კანონი, რომლითაც საქმიანობა აეკრძალა, ერთ კვირაში გაუქმდა მის წინააღმდეგ საქმეები და იქიდან ორ დღეში ის გახდა თურქეთის პრემიერმინისტრი. ასე რომ ამის პრეცედენტების მეტი რაა. ზუსტად ასეთივე სიტუაცია იყო მალაიზიაში, ასეთივე სიტუაცია იყო სხვა რამდენიმე ქვეყანაში", — განაცხადა სააკაშვილმა.

სააკაშვილის თქმით, პარაშენკოს ყველა მცდელობა, რომ იგი ქართული ოცნებისთვის გადაეცა, კრახით დასრულდა და აღნიშნა, რომ ქართულ ოცნებას არ უნდოდა მისი საქართველოში ჩაყვანა.

"ყველაფერს აკეთებენ, რომ საქართველოში არ აღმოვჩნდე, თუნდაც ციხეში. როგორც კი პარაშენკო შეიცვალა, ერთ დღეში დაიხურა ყველა ის საქმე, რომელიც ჩემ წინააღმდეგ იყო აღძრული უკრაინაში. ზუსტად ასე დაიხურება საქართველოში.", — აღნიშნა სააკაშვილმა.

მისი განცხადებით, მთავარია, ქართველი ხალხის მხნეობა, ერთიანობა და არჩევნებზე დარაზმვა და შემდეგ ყველაფერი დადგება თავის ადგილას.