"ეკონომიკური კრიზისი იქნება გრძელვადიანი და ლარის გაუფასურების პროცესი პროგრესირებადი, თუ ქართული ოცნების მთავრობა მყისიერ ნაბიჯებს არ გადაგამს", — განაცხადა სტრატეგია აღმაშენებლის ერთ-ერთმა ლიდერმა, სერგო ჩიხლაძემ ლარის კურსზე საუბრისას. მან მთავრობის მხრიდან ეროვნული ვალუტის სინჯანსაღესთან დაკავშირებით გაკეთებულ განცხადებებს აბსურდული უწოდა.

"ქალბატონი მინისტრის და მთავრობის ლარის სიჯანსაღესთან დაკავშირებით გაკეთებული განცხადებები, ზოგადად, მიანიშნებს იმ ფაქტზე, რამდენად აცდენილები არიან და ვერ აღიქვამენ რეალობას. ლარის გასამყარებლად მარტო წლის დასაწყისიდან დღემდე ეროვნულმა ბანკმა დახარჯა 400 000 000-მდე დოლარი და ჩვენი ინფორმაციით, წლის ბოლომდე 150-200 მლნ. დოლარის დახარჯვას გეგმავს", — აცხადებს სერგო ჩიხლაძე.

"მიუხედავად ასეთი ინექციებისა, ლარი წლის დასაწყისიდან ახლანდელ ნიშნულთან შედარებით, მაინც მკვეთრად გაუფასურებულია და სამწუხაროდ, ეს პროცესი კვლავ გაგრძელდება. ამის მიზეზია ის, რომ ბიზნესს არ აქვს მთავრობის მიმართ ნდობა, ვერ გრძნობენ მხარდაჭერას და უფრო მეტიც, მათი მხრიდან, მიმდინარე პროცესებთან დაკავშირებით ძირითადად ნეგატიური მოლოდინებია. განსაკუთებით კი, ახლა და ეს, რა თქმა უნდა, ეროვნული ბანკის არასწორი მენეჯმენტისა და ეკონომიკური პოლიტიკის შედეგია. სამწუხაროდ, ის არასწორი სვლები და მათ შორის, ეკონომიკური მიმართულებით, რომელიც ქართული ოცნების მთავრობას აქვს აღებული, დღესაც გრძელდება. შესაბამისად, ამ ფონზე ლარის გაუფასურების პროცესი წლის ბოლომდე გაგრძელდება. უფრო მეტიც, ინფლაციის პროცესი იქნება უფრო მეტად პროგრესირებადი, ვიდრე დღეს არის", — განაცხადა სერგო ჩიხლაძემ.