სტრატეგია აღმაშენებლის ლიდერები სერგო ჩიხლაძე და თეონა აქუბარდია სოფელ ხურვალეთში იმყოფებოდნენ, სადაც რამდენიმე დღეა რუსული საოკუპაციო რეჟიმის მიერ უკანონო ე.წ. ბორდერიზაცია მიმდინარეობს.

"ჩვენ შევხვდით სოფელ ხურვალეთის მოსახლეობას რომელთა მთავარი პრობლემა ოკუპაციასთან ერთად უწყლობა, ტრანსპორტი, ამბულატორია და ის ზოგადად უმუშევრობაა, რომელიც მთელ ქვეყანას აწუხებს. სტრატეგია აღმაშენებელს შემუშავებული აქვს კონკრეტული ხედვა ანტი საოკუპაციო ქმედებებთან დაკავშირებით. საოკუპაციო ხაზთან მცხოვრები მოსახლეობისთვის მნიშვნელოვანია სახელმწიფო მხარდაჭერა რაც სამწუხაროდ არ აქვთ, ასევე მნიშვნელოვანია, რომ ეს ადამიანები, რომლებიც ამაგრებენ დღეს საოკუპაციო საზღვარს ჰქონდეთ ელემენტარული მატერიალური შესაძლებლობა", — განაცხადა თეონა აქუბარდიამ.

სტრატეგია აღმაშენებლის ერთ-ერთი ლიდერის თქმით, მნიშვნელოვანია სახელმწიფო პროგრამების განხორციელება რათა არ მოხდეს სოფლების სრულად დაცლა.

"ელემენტარული პირობების შექმნა მათი ღირსეული ცხოვრებისთვის და რაც მთავარია ქვეყანას უნდა ჰქონდეს დეოკუპაციისა და მცოცავი ოკუპაციის შესაჩერებელი საოკუპაციო სტრატეგია, რათა ქვეყანაში კეთილდღეობა, სტაბილურობა და უსაფრთხოება იყოს დაცული", — განაცხადა თეონა აქუბარდიამ.