ტურიზმის ეროვნული ადმინისტრაციის ხელმძღვანელისა და ქართული ოცნების პროპორციული სიის წევრის, მარიამ ქვრივიშვილის განცხადებით, საქართველო 16-17 სექტემბერს გაეროს მსოფლიო ტურიზმის მნიშვნელოვან ღონისძიებას უმასპინძლებს. ამის შესახებ მან საკოორდინაციო საბჭოს სხდომის დასრულების შემდეგ გამართულ ბრიფინგზე ისაუბრა.

"აღნიშნულს აქვს რამდენიმე დატვირთვა და ყველაზე მნიშვნელოვანი არის ის, რომ საქართველო კიდევ ერთხელ იქნა შერჩეული მასპინძლად, რადგან ჩვენი ქვეყანა არის მწვანე ზონა, რომელმაც მთელს მსოფლიოს ანახა წარმატებული Covid-19-თან ბრძოლის ისტორია და რაც ყველაზე მნიშვნელოვანია, პროცესების სწორი მართვის გამოცდილება. ამიტომ 16-17 სექტემბერს საქართველოს ეწვევა მსოფლიოში ყველაზე გავლენიანი, ყველაზე მნიშვნელოვანი ღირებულების მომტანი საჯარო მოხელეები სხვადასხვა ქვეყნებისგან და ყველა სექტორიდან, რომლებიც მართავენ ტურიზმის ინდუსტრიას", — განაცხადა ქვრივიშვილმა.

ეს პირველი შეთხვევა არ არის, როდესაც სამთავრობო გუნდში აცხადებენ, რომ ქვეყანა მასშტაბურ ტურისტულ ღონისძიებას უმასპინძლებს. ჯერ კიდევ საკარანტინო შეზღუდვების დროს მთავრობა აანონსებდა, რომ სექტემბერში საერთაშორისო ტურისტული კონფერენციები მოეწყობოდა, თუმცა საზღვრების გახსნა რამდენჯერმე გადაიდო ეპიდვითარების გამო.

დღეს, 14 სექტემბერს საქართველოში კორონავირუსის 165 შემთხვევა დადასტურდა, რაც რეკორდული მაჩვენებელია.