ბელარუსის პრეზიდენტი ალექსანდრ ლუკაშენკო ვლადიმერ პუტინთან შესახვედრად სოჭში ჩაფრინდა. როგორც ბელარუსის სახელმწიფო მედია იუწყება, პუტინსა და ლუკაშენკოს შორის მოლაპარაკებები ერთი ერთზე გაიმართება. ისინი ორმხრივი ურთიერთობების განვითარებას, საერთაშორისო პრობლემებსა და რეგიონში არსებულ ვითარებას განიხილავენ.

კრემლის პრესსპიკერის, დმიტრი პესკოვის თქმით, შეხვედრის შემდეგ რაიმე დოკუმენტის ხელმოწერა ან პრესკონფერენცია არ იგეგმება.

ლუკაშენკოსთან შეხვედრამდე ოპოზიციონერმა სვეტლანა ტიხანოვსკაიამ ვლადიმერ პუტინს მიმართა. მისი თქმით, ის წუხს იმის გამო, რომ პუტინმა გადაწყვიტა, დიალოგი ეწარმოებინა უზურპატორთან და არა ხალხთან.

ფოტო: Belta

ბელარუსში ჩატარებული საპრეზიდენტო არჩევნების შემდეგ ქვეყანა საპროტესტო აქციებმა მოიცვა. მოქალაქეები ალექსანდრ ლუკაშენკოს კვლავ გაპრეზიდენტებას აპროტესტებენ და არჩევნების თავიდან ჩატარებას მოითხოვენ. არჩევნების შედეგებს არ აღიარებს გაერთიანებული ოპოზიციის კანდიდატი სვეტლანა ტიხანოვსკაია, რომელიც შედეგების გამოცხადების შემდეგ იძულებული იყო, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.