საქართველოს შინაგან საქმეთა სამინსიტროს ცნობით, 5 სექტემბერს ოკუპირებული გალის რაიონის სოფელ საბერიოში გატაცებული ჯემალ სოსელიას საქმეზე გამოძიება სისხლის სამართლის კოდექსის 143 მუხლით დაიწყო, რაც თავისუფლების უკანონო აღკვეთას გულისხმობს. სოსელიას გატაცებაზე გამოძიება თბილისში მოქმედმა აფხაზეთის ავტონომიური რესპუბლიკის პოლიციის დეპარტამენტმა დაიწყო. სხვა დეტალებზე ამ დროისათვის უწყებაში არ საუბრობენ.

58 წლის ბიზნესმენი, ჯემალ სოსელიას ავტომობილი ოთხმა შეიარაღებულმა პირმა ხუთ სექტემბერს გააჩერა, რის შემდეგაც ისინი შიგნით ჩასხდნენ და სოსელია აიძულეს, ენგურჰესისკენ — საოკუპაციო ხაზის მიმართულებით წაეყვანა მანქანა. ეხო კავკაზას ინფორმაციით, გზაზე სოსელიამ ავტომობილი სხვა მიმართულებით იმ იმედით შეაბრუნა, რომ მას ვინმე შეამჩნევდა და დაეხმარებოდა. თუმცა, როცა თავდამსხმელებმა მანქანის სხვა გზით სვლა შეამჩნიეს, სოსელიას გონების დაკარგვამდე სცემეს. ამის მოწმე კი ენგურჰესის ორი თანამშრომელი გახდა, რომლებიც ადგილზე დახმარების აღმოსაჩენად მივიდნენ. წყარო იტყობინება, რომ თავდამსხმელებმა თვითმხილველებსაც სცემეს და ტელეფონები წაართვეს. სოსელია კი ისევ მანქანაში ჩასვეს და ტყვარჩელის მიმართულებით წაიყვანეს. ეხო კავკაზას წყარო ირწმუნება, რომ თავდამსხმელები მეგრულ-ქართულად საუბრობდნენ. მისი ცნობითვე, დასისხლიანებული მანქანა ტყვარჩელის რაიონში, აჭაკაში მიმავალ გზაზე აღმოაჩინეს. გატაცებულის ადგილმდებარეობა ამ დრომდე უცნობია.

გალის რაიონის დე ფაქტო ადმინისტრაციის ყოფილ ხელმძღვანელ, თემურ ნადარაიას მიაჩნია, რომ თავდამსხმელები საქართველოს ხელისუფლების მიერ კონტროლირებადი ტერიტორიიდან შევიდნენ ოკუპირებულ ტერიტორიაზე და შესაძლოა, ადგილზე დამხმარეებიც ჰყავდეთ.

სოსელია რუსეთის მოქალაქეა, რომელიც სოჭში ცხოვრობს, სადაც ბიზნესსაქმიანობას ეწევა. ცოტა ხნის წინ კი, სოფელ საბერიოში აიშენა სახლი და მშობლიურ სოფელში პერიოდულად ჩადის.