გირჩის ერთ-ერთი ლიდერი, ბათუმის მაჟორიტარობის კანდიდატი,იაგო ხვიჩია სექსისტურ განცხადებას აკეთებს და ამბობს, რომ კაცები უფრო მეტად არიან გამბედავები და პოლიტიკა ქალებს ნაკლებად აინტერესებთ, რადგან, მისი თქმით, ამ საქმეს სწორედ "გამბედაობა" სჭირდება. ამის შესახებ მან ბათუმელებისთვის მიცემულ ინტერვიუში ისაუბრა.

ხვიჩიას თქმით, არსებობს პროფესიები, რომლებიც კაცებს უფრო მეტად აინტერესებთ და პირიქით — ქალებს უფრო მეტად აინტერესებთ. ქალების უფლებებზე საუბარი გენდერულ კვოტებთან დაკავშირებით კითხვების შემდეგ გაგრძელდა. ჟურნალისტის შემდეგი კითხვა ეხებოდა იმას, მოიაზრებს თუ არა იაგო ხვიჩია ქალებისთვის ნაკლებსაინტერესოდ პოლიტიკას, რასაც მაჟორიტარობის კანდიდატი სექსისტურად პასუხობს:

"ნაკლებად აინტერესებთ. ეს იმას კი არ ნიშნავს, რომ ქალი პოლიტიკოსი მაგარი არ შეიძლება იყოს, პროცენტულად რომ ავიღოთ 1 000 კაცი და 1 000 ქალი, რომელი უფრო მეტი გამოხატავს რაოდენობრივად პოლიტიკის ინტერესს, კაცების რაოდენობა იქნება ბევრად მეტი, ვინაიდან ეს საქმიანობა არის უფრო რისკიანი, თავის თავში მოიცავს უფრო მეტ სარისკო საქმეს, მეტი გამბედაობა სჭირდება რაღაცნაირად", — აღნიშნავს ის.

ჟურნალისტის კითხვაზე, საიდან დაადგინა, რომ ქალებს გამბედაობა არ აქვთ, იაგო ხვიჩია მორიგ სექსისტურ პასუხს სცემს:

"გამბედავები როგორ არ არიან, მაგას კი არ ვამბობ, ყველა ქალი ასეთია, მაგრამ კაცები უფრო მეტად არიან გამბედავები. ქალები უფრო მეტად სხვა რამეს არჩევენ, ბიოლოგიური მოცემულობაა ეს, ყველგან ასეა, სამყაროში. მაგალითად, ძალადობისკენ მიდრეკილ პროფესიებს უფრო ნაკლებად ირჩევენ ქალები ფიზიკურად, ასეთია, მაგალითად, ჯარისკაცები, სადაც ქალები არიან, მაგრამ უმეტესობა კაცები არიან. მაგალითად, აღმზრდელები, ძიძები პროცენტულად ქალები მეტნი არიან? მათი ბუნებიდან გამომდინარე, ეს მათთვის უფრო გასაგებია. განა კაცი ძიძები არ არსებობს, უბრალოდ ნაკლებად ირჩევენ. ჩვეულებრივი, ბუნებრივი ამბავია, რომ ქალები და კაცები განვსხვავდებით ერთმანეთისგან, უფლებრივად ვართ თანასწორები თორემ, თავისთავად ცხადია, რომ როცა ადამიანები განსხვავებულები ვართ, მათ შორის, სქესის ნიშნითაც, ჩვენ სხვადასხვა რამეები გვაინტერესებს".

გარდა ამისა, მაჟორიტარობის კანდიდატი აცხადებს, რომ არცერთი შემთხვევა ქართულ პოლიტიკურ და სამართლებრივ სივრცეში არ არსებობს, როდესაც ქალები სქესის მიხედვით დაიჩაგრნენ.

"იმის მიუხედავად, რომ დიდი ქვეყანა არ ვართ, არცერთი შემთხვევა ქართულ პოლიტიკურ და სამართლებრივ სივრცეში არ არსებობს, როცა ქალები სქესის მიხედვით დაიჩაგრნენ. ასეთი პრეცედენტი არ არსებობს. როცა არასამთავრობო სექტორს ვხდებოდი, ვერ დამისახელეს ერთი შემთხვევაც კი, როცა ქართულ პოლიტიკაში ქალი დაიჩაგრა გენდერული ნიშნით. მე, ზოგადად, მხარს ვუჭერ იმას, რომ ადამიანები თანასწორები არიან: ქალები, კაცები, ბავშვები, ცისფერთვალიანები, სომხები, აზერბაიჯანელები, არ აქვს ამას მნიშვნელობა", — ამბობს ხვიჩია.

მან ასევე აღნიშნა, რომ ამ ქვეყანაში არსებობენ "არანორმალური ადამიანები", რომლებიც მიიჩნევენ, რომ ვიღაცის უფროსები და ბატონები არიან და ასეთი არიან არამხოლოდ კაცები ქალების მიმართ, არამედ, მაგალითად, დამსაქმებელი დასაქმებულის მიმართ. ხვიჩიას თქმითვე, ზოგადად, არანორმალური ადამიანები საზოგადოებაში არსებობენ და შესაძლებელია, მათი რაოდენობა ბევრი იყოს, ან ცოტა, თუმცა ეს არ ნიშნავს, რომ ამ ქვეყანაში ჩვენ ჩაგვრა გვაქვს მოწყობილი.

ჟურნალისტის დამაზუსტებელ კითხვას, ჩაგრავენ თუ არა ქალებს, მაჟორიტარობის კანდიდატი ასე პასუხობს:

"კი, მაგრამ კაცებსაც ჩაგრავენ. არ მინდა ისე გამოვიდეს, რომ საქართველოში ქალებს არ ჩაგრავენ, არც იქნება მართალი. საქართველოში ქალებსაც ჩაგრავენ, კაცებსაც, მოხუცებსაც, ბავშვებსაც…".

ოჯახში ძალადობის სტატისტიკის მონაცემები, ხვიჩიას თქმით, იხსნება იმით, რომ "კაცები ფიზიკურად უფრო აგრესიულები არიან".

"ზოგადად, კაცები ფიზიკურად უფრო აგრესიულები არიან, მიდრეკილი დანაშაულისკენ, ციხეში ბევრად მეტია პროცენტულად კაცი, ვიდრე ქალი, ამიტომ ის კი არ გამოდის, რომ ვიღაც ცოლზე ძალადობს და ქალებს უყურებს სხვანაირად, არამედ კაცები უფრო მიდრეკილი არიან ძალადობისკენ, ბუნებრივად ასეა", — აცხადებს იაგო ხვიჩია.