ბელარუსი მწერალი და ლიტერატურის დარგში ნობელის პრემიის 2015 წლის ლაურეატი, სვეტლანა ალექსიევიჩი მის სახლში ნიღბიანების შეჭრის მცდელობაზე საუბრობს. BBC-ს ცნობით, მომხდარის შესახებ მან მედიის წარმომადგენლებსაც აცნობა. ალექსიევიჩი მოინახულეს, ასევე, ევროპელმა დიპლომატებმაც.

სვეტლანა ალექსიევიჩი ოპოზიციის საკოორდინაციო საბჭოს უკანასკნელი წევრია, რომელიც ჯერ კიდევ არ დაუკავებიათ. თუმცა, 25 აგვისტოს ის საგამოძიებო კომიტეტში დაიბარეს და ოპოზიციურ ორგანიზაციებთან კავშირის გამო დაკითხეს.

საკოორდინაციო საბჭოს 7 წევრიდან 6 დაკავებულია ან ქვეყნიდან ძალდატანებით არის გაძევებული. მათ შორის მარია კოლესნიკოვა, რომელსაც ლუკაშენკოს რეჟიმი ხელისუფლების ხელში ჩაგდების მცდელობას ედავება.

ბელარუსში ჩატარებული საპრეზიდენტო არჩევნების შემდეგ ქვეყანა საპროტესტო აქციებმა მოიცვა. მოქალაქეები ალექსანდრ ლუკაშენკოს კვლავ გაპრეზიდენტებას აპროტესტებენ და არჩევნების თავიდან ჩატარებას მოითხოვენ. არჩევნების შედეგებს არ აღიარებს გაერთიანებული ოპოზიციის კანდიდატი სვეტლანა ტიხანოვსკაია, რომელიც შედეგების გამოცხადების შემდეგ იძულებული იყო, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.