ადამიანის უფლებათა ცენტრის იურისტის, ეკა ქობესაშვილის თქმით, თამარ ბაჩალიაშვილის საქმეზე არსებული სატელიტის ფოტოები ევროკავშირის კორპორაციული სასწავლო პროგრამის ფარგლებშია გადაღებული. მისი თქმით, პროგრამაში ევროკავშირის ოთხი ძირითადი ქვეყანა იყო გაერთიანებული და დამატებით 10 ქვეყნის ინტერესიც შედიოდა.

"ეს იყო გარკვეული სასწავლო პროგრამა და ამ ევროკავშირის კორპორაციული პროგრამის ფარგლებში ხდებოდა ამ ფოტოების გადაღება. ეს ხალხი დაგვეხმარა ჩვენ, მოიპოვა ეს ფოტოსურათები და გადმოგვცა. ასევე, პასუხისმგებლობა აიღეს იმაზე, რომ ეს ფოტოები ნამდვილად იმ თარიღით და იმ ადგილისაა, რაზედაც ბატონმა მიშამ გააკეთა განცხადება", — ამბობს იგი.

თამარ ბაჩალიაშვილის საქმეში ჩართვის შემდეგ, დღეს, 9 სექტემბერს, ადამიანის უფლებათა ცენტრმა (HRIDC) პირველი კომენტარი გააკეთა. ხელმძღვანელმა, ალეკო ცქიტიშვილმა განაცხადა, რომ ცენტრი თამარ ბაჩალიაშვილის საქმის მკვლელობის მუხლით გადაკვალიფიცირებას მოითხოვს.

ამასთან, ცქიტიშვილმა აღნიშნა, რომ სატელიტის კადრებს, რომელიც მიხეილ რამიშვილმა გუშინ, 8 სექტემბერს გააცნო საზოგადოებას, ადამიანის უფლებათა ცენტრი სრულად ენდობა. აღნიშნულ კადრებში ჩანს, რომ 19-20 ივლისს ბაჩალიაშვილის მანქანა იმ ტერიტორიაზე, სადაც იგი იპოვეს, არ იდგა.