სტრატეგია აღმაშენებლის ლიდერი, გიორგი ვაშაძე პოლიტიკური მოძრაობის ერთ-ერთი წევრის პირადი ცხოვრების ამსახველი მასალებით შანტაჟის შესახებ გაკეთებულ განცხადებასთან დაკავშირებით პოლიციაში დაიბარეს.

სტრატეგია აღმაშენებლის ერთ-ერთი ლიდერის, სერგო ჩიხლაძის განცხადებით, გიორგი ვაშაძე საგამოძიებო უწყებას უნდობლობას უცხადებს და პოლიციაში გამოცხადებას არ აპირებს.

"გიორგი ვაშაძე პოლიციაში არ გამოცხადდება. ჩვენ პოლიციის მიმართ არსებულ უნდობლობაზე არაერთხელ გვითქვამს. შედეგად, გიორგი ვაშაძე კანონმდებლობის ფარგლებში მოითხოვს და მიმართავს სასამართლოს, შესაბამისად, მისი გამოკითხვა მოსამართლის თანდასწრებით მოხდება, როგორც ამას კანონი ითვალისწინებს", — განაცხადა სერგო ჩიხლაძემ.

მისივე თქმით, ანალოგიური საქმეების გამოძიებისა და პოლიციის მიმართ სტრატეგია აღმაშენებლის ნდობა არის ნულოვანი, რადგან არცერთი დამნაშავე დღემდე არ დასჯილა და ის ადამიანები, რომლებიც იყვნენ მსხვერპლნი, პირადი ცხოვრების ამსახველი მასალების გასაჯაროების ფაქტების ვითომდა გამოძიების დროს, დღეს თავად აღმოჩნდნენ დაზარალებულები.

გიორგი ვაშაძემ 6 სექტემბერს განაცხადა, რომ მისი შტაბის წევრს პირადი ცხოვრების ამსახველი კადრების გასაჯაროებით ემუქრებიან. მან მთავრობას წინა საარჩევნო პერიოდში პირადი ცხოვრების ხელშეუხებლობის დაცვის უზრუნველყოფისკენ მოუწოდა და თქვა, რომ წინააღმდეგ შემთხვევაში მათი რეაქცია უმკაცრესი იქნება.