მთავრობის ადმინისტრაციის უფროსმა, ნათია მეზვრიშვილმა საკოორდინაციო საბჭოს სხდომის შემდეგ განაცხადა, რომ რეგულაციებისა და მოთხოვნების შესრულების კონტროლი გამკაცრდება.

"პირბადეების რეგულაციის და ამ მოთხოვნის შესრულება გახლავთ განსაკუთრებით მნიშვნელოვანი, რაც მკაცრად იქნება გაკონტროლებული შესაბამისი სახელმწიფო უწყებების მიერ. ასე ვთქვათ, აღსრულების კონტროლი მოხდება აქტიურად და შედარებით უფრო გამკაცრდება. აქტიურად იმუშავებს, როგორც პოლიცია, ასევე, შრომის ინსპექცია, ამიტომ კიდევ ერთხელ მოგიწოდებთ, რომ წესები მაქსიმალურად დაიცვათ", — განაცხადა ნათია მეზვრიშვილმა.

მანვე მოუწოდა მოქალაქეებს დაიცვან წესები, გამოიჩინონ მაღალი სამოქალაქო პასუხისმგებლობა, ატარონ პირბადეები და დაიცვან დისტანცია.