ბელარუსის პრეზიდენტობის კანდიდატი და ოპოზიციონერი სვეტლანა ტიხანოვსკაია რუსეთის მოსახლეობისთვის მიმართავს, არ მოექცნენ ტყუილის ზეგავლენის ქვეშ. ვიდეო ტელეგრამის არხმა პულ პერვოი წარადგინა.

"რუსული პროპაგანდა მაქსიმალურად ცდილობს, დაამახინჯოს ბელარუსში მიმდინარე მოვლენები. მოგიწოდებთ, არ მოექცეთ ამ ტყუილის გავლენის ქვეშ და იცოდეთ რეალური მიზეზი, რატომ ითხოვს ბელარუსი ხალხი ლუკაშენკოს წასვლას", — განაცხადა ტიხანოვსკაიამ.

ტიხანოვსკაიამ აღნიშნა, რომ მოსახლეობა ლუკაშენკოს წასვლას, სამართლიანი არჩევნების ჩატარებასა და პოლიტპატიმრების გათავისუფლებას ითხოვს.

"არც ერთ ეტაპზე საპროტესტო მოძრაობა არ იყო ბრძოლა რუსეთის წინააღმდეგ და მე დარწმუნებული ვარ, ასეთი არც გახდება. არ დაუჯეროთ პროპაგანდისტულ მედიას და პოლიტიკოსებს, რომლებიც საწინააღმდეგოს ამბობენ. ძალიან მნიშვნელოვანია, რომ ჩვენს ერებს შორის ურთიერთობა არ გაფუჭდეს", — განაცხადა ტიხანოვსკაიამ.

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ. ცენტრალური საარჩევნო კომისიის მტკიცებით, ლუკაშენკომ ხმების 80% აიღო, ტიხანოვსკაიამ — 10%.

არჩევნების შემდეგ სვეტლანა ტიხანოვსკაია, რომლის ქმარიც ბელარუსის ციხეში იმყოფება, იძულებული იყო ქვეყნიდან გაქცეულიყო. ის ახლა შვილებთან ერთად ლიეტუვაშია.