საკოორდინაციო საბჭოს სხდომის დასრულების შემდეგ დაავადებათა კონტროლის ცენტრის ხელმძღვანელმა, ამირან გამყრელიძემ განმარტა, რატომ შემცირდა საკარანტინე ვადა 8 დღემდე.

"გერმანელი ვირუსოლოგის ჰიპოთეზის თანახმად, ინფიცირებიდან 5 დღის შემდეგ ვირუსი სერიოზულად დასუსტებულია. საერთაშორისო კვლევები კი ამბობენ, რომ მეშვიდე-მერვე დღიდან ადამიანი გადამდები აღარ არის, მიუხედავად იმისა, ინფიცირებული აღმოჩნდება თუ არა", — აღნიშნა ამირან გამყრელიძემ.

მისივე თქმით, ჯანმრთელობის მსოფლიო ორგანიზაციის მიერ მოწოდებული დებულებით, კლასიკურად ინკუბაციის ვადა იყო 2-დან 14 დღემდე. მაგრამ ასევე, ამბობდნენ, რომ ქვეყანამ ინდივიდუალურად უნდა დაადგინოს ვადები.

"ჩვენ დავიწყეთ 14 დღით და ჩამოვედით 8 დღემდე", — თქვა ამირან გამყრელიძემ.

მანვე აღნიშნა, მიუხედავად იმისა, რომ კარანტინის ვადა 8 დღემდე ჩამოვიდა, პირი ვალდებულია, მე-12 დღეს ისევ ჩაიტაროს ტესტირება.