დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, აგვისტო-სექტემბერში აჭარაში კორონავირუსის 156 დადებითი შემთხვევაა დაფიქსირებული, მათგან 40 უკავშირდება საკონდიტრო დონას კლასტერს, 30 — ქობულეთს, ხოლო 1 — ჩაქვის სასტუმრო ოაზისს.

"აქედან გამომდინარე, დღევანდელი დღით, ყველაზე უფრო დაძაბული და ცხელ წერტილად გვაქვს აჭარის რეგიონი, ამიტომ იქნა ეს გარკვეული ღონისძიებები დაწესებული, კერძოდ, სწავლასთან დაკავშირებული", — ამბობს გამყრელიძე.

პირველ ოქტომბრამდე, ანუ სასწავლო წლის დაწყების პირველი ორი კვირა, ბათუმსა და ქობულეთში სწავლა დისტანციურად წარიმართება. ამის შესახებ პრემიერმინისტრმა გიორგი გახარიამ განაცხადა.

აჭარაში, კორონავირუსით ინფიცირებულების გაზრდის გამო, სასწავლო პროცესი 2 კვირის განმავლობაში დისტანციურად დაიწყება, დანარჩენი სკოლები კი სწავლას ჩვეულ რეჟიმში, 15 სექტემბრიდან დაიწყებენ.