საქართველოს საარჩევნო კოდექსის ცვლილებები პარლამენტში დღეს 2 სექტემბერს გამართულ პლენარულ სხდომაზე პირველი მოსმენით მიიღეს. ცვლილებებს 77 დეპუტატმა დაუჭირა მხარი, წინააღმდეგი არცერთი იყო.

ამ შედეგში ეჭვი შეიტანა პარლამენტის წევრმა, გედევან ფოფხაძემ და მანდატურებს დარბაზში პარლამენტარების დათვლა თხოვა. სხდომის თავმჯდომარემ, გაგა კახიანმა ტექნიკური შესვენება გამოაცხადა, რომლის დასრულების შემდეგ განაცხადა, რომ დეპუტატები გადათვალეს და რომ შედეგის ბათილად ცნობის საფუძველი არ არსებობს.

კანონპროექტის დამტკიცებამდე გედევან ფოფხაძემ საარჩევნო კოდექსში შესატანი ცვლილებების შესახებ კანონპროექტი გააკრიტიკა და მისი უკან გაწვევა მოითხოვა. მან თავის კოლეგებს მოუწოდა, ინიციატივას მხარი არ დაუჭირონ, რადგან მისივე თქმით, კანონპროექტი არაფრის მომცემი არის. მომხსენებლის, მმართველი გუნდის დეპუტატის, რატი იონათამიშვილის განცხადებით, ცვლილებებით შესაძლებელი იქნება მოხდეს პრევენცია, ამომრჩეველზე ზეგავლენა (დაშინება, იძულება, ან მისი ფარულობის დარღვევა) ვერავინ მოახდინოს. ცვლილებები, ძირითადად, ამომრჩევლის დაშინების ან იძულების ჩანაწერის გამკაცრებას გულისხმობს. საუბარია სასჯელის რამდენიმე თვით ან წლით გაზრდაზე.