ფრაქცია დამოუკიდებელი დეპუტატების წევრი ლევან გოგიჩაიშვილი პარლამენტში საკომიტეტო მოსმენაზე ეკონომიკის მინისტრს ნათია თურნავასა და წყალმომარაგების მარეგულირებელი კომისიის თავმჯდომარეს დავით ნარმანიას იბარებს. მისი თქმით, მოქალაქეს ელექტროენერგია უძვირდება და უნდა მოხდეს მოკვლევა, თუ რატომ ვიხდით ყოველწლიურად ზედმეტ 9 მილიონ დოლარს.

"შესყიდვის დროს კომპანია ელ-გრინი, რომელსაც წარმოდგენენ, როგორც ქართველი, ასევე აზერბაიჯანელი დამფუძნებლები, არის ელექტრონერგიის შემსყიდველი და ჩვენს მოქალაქეს საბოლო ჯამში ელექტროენერგია უძვირდება. ამ სისტემური კორუფციის სქემის უკან დგას ბიძინა ივანიშვილის ნებით დაშვებული პროცესი, დგას უჩა მამაცაშვილი და ის ადამიანები, რომლებიც თქვენს ხარჯზე ხელს ითბობენ და სახელმწიფოს და ჩვენს მოქალაქეებს ეს შესყიდვა ზედმეტ 9 მილიონ დოლარად უჯდება. ამიტომ ჩვენი ფრაქცია აყენებს საკითხს, იურიდიული და ეკონომიკური კომიტეტების მიმართ, რომ აღნიშნულ საკითხთან დაკავშირებით მოხდეს მოკვლევა, დავიბაროთ ეკონომიკის მინისტრი, ელექტროსისტემის ხელმძღვანელი, დავით ნარმანია და ყველა ის ადამიანი, ვინც არის ასეთი დონის გადაწყვეტილებებზე პასუხისმგებელი და მოვიკითხოთ, რატომ ვიხდით ყოველწლიურად ზედმეტ 9 მილიონ დოლარს და ვუხდით ისეთ კომპანიას, რომლის გარეშე სახელმწიფო და მოქალაქეები შეძლებდნენ ამ თანხის დაზოგვას", — განაცხადა ლევან გოგიჩაიშვილმა.