ქართული ოცნების აღმასრულებელი მდივანი, ირაკლი კობახიძე ექსპრეზიდენტის, მიხეილ სააკაშვილის საქართველოში დაბრუნების დაპირების შესახებ აცხადებს, რომ "მას უნდა შევასრულებინოთ მისი პირობა და უნდა დავაბრუნოთ საქართველოში, რათა ექსპრერზიდენტმა კანონის წინაშე მთელი სიმკაცრით აგოს პასუხი".

კობახიძის თქმით, მიხეილ სააკაშვილის ვიდეოში გაჟღერებული ბოდიში მის მიმართ წაყენებული ბრალდებების აღიარებაა.

"ბოდიში არის აღიარება იმ უმძიმესი დანაშაულებებისა, რომლებიც თავის დროზე ჩაიდინა ნაციონალურმა მოძრაობამ მიხეილ სააკაშვილის ხელმძღვანელობით და ამ ბოდიშზე პასუხი, ბუნებრივია, ექნება საზოგადოებას, მაგრამ ამასთან ერთად კიდევ ერთხელ ხაზი უნდა გავუსვათ იმას, რომ საზოგადოების პოლიტიკური პასუხიც არ არის ამაზე საკმარისი, რა თქმა უნდა, მიხეილ სააკაშვილს უნდა შევასრულებინოთ თავისი პირობა, უნდა დავაბრუნოთ საქართველოში", — განაცხადა პარლამენტის ყოფილმა თავმჯდომარემ.

27 აგვისტოს საქართველოს ყოფილმა პრეზიდენტმა, მიხეილ სააკაშვილმა საკუთარ ფეისბუქგვერდზე ვიდეომიმართვა გაავრცელა, სადაც ის ამომრჩეველს ისევ ჩამოსვლას ჰპირდება, თუმცა ამჯერად არ აკონკრეტებს როდის. მმართველი გუნდის წარმომადგენლებმა ვიდეომიმართვის საპასუხოდ განაცხადეს, რომ მიხეილ სააკაშვილს დაბრუნების შემთხვევაში საქართველოში მართლმსაჯულება დახვდება.