2020 წლის საპარლამენტო არჩევნებზე, კორონავირუსის პანდემიის გამო, NDI-სა და IRI-ს დამკვირვებლების დასწრების საკითხი კითხვის ნიშნის ქვეშ დგას. On.ge საერთაშორისო ორგანიზაციების საქართველოს წარმომადგენლებს დაუკავშირდა, რათა არჩევნებზე მათი შესაძლო არდასწრების მიზეზი გაერკვია.

NDI-ს თბილისის ოფისში აცხადებენ, რომ ჯერჯერობით მიღებული არ არის გადაწყვეტილება როგორ და რა ფორმით დააკვირდებიან ოქტომბერში ჩასატარებელ საპარლამენტო არჩევნებს. რაც შეეხება IRI-ს, ორგანიზაციაში განაცხადეს, რომ დამკვირვებლების ჩამოსვლის საკითხი დამატებითი განხილვის პროცესშია.

საპარლამენტო უმრავლესობის წევრმა, ირაკლი კობახიძემ დღეს განაცხადა, რომ კორონავირუსის პანდემიის გამო NDI-სა და IRI-ს დამკვირვებლების არჩამოსვლის საკითხი განიხილება.

"ჩვენ ვქმნით მაქსიმალურად კომფორტულ პირობებს იმისათვის, რომ მაქსიმალურად დიდი რაოდენობით დამკვირვებლები ჩამოვიდნენ საქართველოში, ამ შემთხვევაში სპეციალური პროტოკოლი არის დადგენილი. დღევანდელი მდგომარეობით ვფიქრობთ, რომ საკმაოდ დიდი რაოდენობით ჩამოვლენ დამკვირვებლები საქართველოში ეუთოდან, ოდირიდან და სხვა საპარლამენტო ასამბლეებიდან. ევროპის საპარლამენტო ასამბლეის დამკვირვებლების საკმაოდ მასშტაბური ვიზიტიც იგეგმება. არის მხოლოდ რამდენიმე შემთხვევა, სადაც განიხილება დამკვირვებლების არჩამოსვლის საკითხი", — განაცხადა კობახიძემ ჟურნალისტებთან საუბარში.

მისივე თქმით, დამკვირვებლებისთვის გათვალისწინებულია მხოლოდ PCR ტესტირება, მათთვის ხელისუფლების მხრიდან იქნება შეთავაზებული ლოჯისტიკური განსხვავებული პირობები, შეიძლება დაორგანიზდეს სპეციალური ფრენებიც იმისათვის, რომ დამკვირვებლებს საქართველოში ჩამოსვლა გაუადვილდეთ.