რუსთავში თამარ ბაჩალიაჩვილის მანქანას ექსპერტიზა უტარდება, რომელსაც სამხარაულის ექსპერტებთან ერთად Hyundai-ს წარმომადგენლები ესწრებიან.

"დღეს ავტომობილს ჩაუტარდება ექსპერტიზა, დეტალურად იქნება გამოკვლეული ავტომობილის მდგომარეობა, გადაადგილების პროცესი. იქნება Hyundai-ს წარმომადგენელი და იქნებიან სამხარაულის ექსპერტიზის ბიუროდან. ეს ექსპერტიზა ეხება უშუალოდ იმას, თუ სად იყო ავტომობილი, რამდენად შეეძლო ავტომობილს დამოუკიდებლად გადაადგილება", — აცხადებს ბაჩალიაშვილის ოჯახის ადვოკატი, მიხეილ რამიშვილი ტვ პირველთან საუბრის დროს.

თამარ ბაჩალიაშვილის ოჯახი გამოძიებას და პროკურატურას უნდობლობას უცხადებს და საქმეში FBI-ს ჩართვას ითხოვს. ასევე, მათი მოთხოვნაა პროკურატურამ სახელმწიფო უსაფრთხოების სამსახურის სამი ავტომობილის გადაადგილების ამსახველი სრული ჩანაწერი გაასაჯაროვონ. მათ პროკურატურასთან აქცია გამართეს და თვითმკვლელობის მუხლის განზრახ მკვლელობის მუხლად გადაკვალიფიცირებას ითხოვენ.

თამარ ბაჩალიაშვილის საქმე

23 წლის თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. მათი თქმით, დაკარგულის ავტომობილი ჯერ მარნეულში, ბოლოს კი თეთრიწყაროს მუნიციპალიტეტის სოფელ ხაიშში დააფიქსირეს. საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლელობამდე მიყვანის მუხლი დაემატა.

დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

ოჯახი გამოძიებას უნდობლობას უცხადებს და საქმეში დამოუკიდებელი ექსპერტი ჩაერთო. მათთვის გაურკვეველია, როგორ ვერ იპოვეს მანქანა 4 დღის განმავლობაში, თუკი სამძებრო სამუშაოებში ჩართული იყო დრონი. ადვოკატს, ასევე, აქვს კითხვა, რატომ იპოვა მანქანა მწყემსმა და ვერ მოახერხა ეს პოლიციამ.

ადვოკატის ინფორმაციით, გარდაცვლილის მანქანაში იპოვეს მისი ტელეფონი, რომელიც გამორთული იყო და ამოღებულია სხვადასხვა მედიკამენტიც. რამიშვილს არ აქვს ინფორმაცია, კონკრეტულად რა პრეპარატებია, თუმცა აცხადებს, რომ ფსიქოტროპული არ არის.

სოციალურ ქსელებში და მედიაში გაჩნდა კითხვები ბაჩალიაშვილის სამსახურთან დაკავშირებით. ბაჩალიაშვილს LinkedIn-ის თანახმად, დეველოპერად ორ კომპანიაში, ზეგ-სა და ავსტრიულ Spryflash-ში მუშაობდა. კომპანია ზეგში დღეს შსს შევიდა. დირექტორის თქმით, ბაჩალიაშვილის გარდაცვალება ზეგ-ში საქმიანობას არ უკავშირდება.