ტყიბულისა და თერჯოლის მიტროპოლიტი, მეუფე გიორგი (შალამბერიძე) ამბობს, რომ თერჯოლაში დაღუპულ 11 წლის მოზარდს წესს ვერ აუგებენ, რადგან ამის უფლება არ აქვთ. მისი აზრით, ეს "ღვთის გმობაა". ამის შესახებ მან რუსთავი 2-თან სატელეფონო ინტერვიუში განაცხადა.

"არაფერი არ ვიცი, არავინ არაფერს არ მეუბნება და ვერავინ ვერ გასცემს ხმას უჩემოდ. ვერ გავაკეთებთ, ეს ღვთის გმობაა, სად გვაქვს უფლება? არ შეიძლება, ღმერთს გამონაკლისები არ აქვს, ღმერთი ზუსტად მოქმედებს. 11 წლის ბავშვი გაუაზრებელია? არ მოქმედებს ჩვენს კანონში მასეთი. გამონაკლისები არის როცა ექიმის ცნობები აქვს, თუ ეს არაა, ჩვენ ვერ გავაკეთებთ ვერაფერს", — განაცხადა მიტროპოლიტმა.

საპატრიარქოს თხოვნით მიმართავს დაღუპული ბავშვის ბებია და ამბობს, რომ ბავშვი მორწმუნე იყო და შეიძლება თავი არც მოუკლავს. ის იმედოვნებს, რომ საპატრიარქო გამონაკლისს დაუშვებს.

11 წლის მოზარდის თვითმკვლელობამდე მიყვანის მცდელობით მამაა დაკავებული. ოჯახის წევრები ვარაუდობენ, რომ მამამ ბავშვი ცემისას მოკლა და თვითმკვლელობის ინსცენირება სცადა.

წესის აგების საკითხი სასულიერო პირებმა პრობლემად აქციეს ლუკა სირაძის შემთხვევაში. ისინი ამბობდნენ, რომ გარდაცვლილ 11 წლის ბავშვს წესს ვერ აუგებდნენ, რადგან თვითმკვლელობის შემთხვევაში ამას რელიგიური წესი არ ითვალისწინებს. მოგვიანებით მათ განაცხადეს, რომ პატრიარქის კურთხებით ლუკა სირაძეს წესს აუგებდნენ.

On.ge ცდილობს საპატრიარქოს პრესსამსახურთან დაკავშირებას, მათ პასუხს მიღებისთანავე შემოგთავაზებთ.