ოკუპირებული მთავრობის დე ფაქტო პრემიერმინისტრმა, ერიკ პუხაევმა თანამდებობა დატოვა. ინფორმაცია ამის შესახებ ადგილობრივმა სახელისუფლება გამოცემა რეს-მა გაავრცელა.

მანამდე ეხო კავკაზა წერდა, რომ მთავრობა დე ფაქტო პრეზიდენტმა ანატოლი ბიბილოვმა დაითხოვა.

როგორც პუხაევის განცხადებაშია აღნიშნული, იგი გადაწყვეტილებას გააზრებულსა და სწორს უწოდებს.

"დღეს მე მოედანზე ვიყავი. ხალხს მოვუსმინე, ზოგიერთი მთავრობის გადადგომის მოთხოვნას სკანდირებდა. ამ გადაწყვეტილებას ვიღებ. გავიაზრე და მიმაჩნია, რომ ეს სწორი იქნება", — აღნიშნულია განცხადებაში.

მას შემდეგ რაც ცნობილი გახდა, რომ საპატიმროში 28 წლის ინალ ჯაბიევი გარდაიცვალა, ცხინვალის ცენტრში ათეულობით მოქალაქე შეიკრიბა და საპროტესტო აქცია მოაწყო. იგი წინა კვირას დე ფაქტო შს მინისტრზე, იგორ ნანიევზე თავდასხმის ბრალდებით დააკავეს. ბრალდებულის გარდაცვალების შემდეგ ნანიევი გადააყენეს და სისხლის სამართლის საქმე აღძრეს.

აქციის მონაწილეებთან ანატოლი ბიბილოვიც იყო გასული, თუმცა ის მომიტინგეებმა შეძახილებით გააცილეს. შეკრებილები პრეზიდენტისა და მთავრობის გადადგომას მოითხოვენ.