დიდუბე-ჩუღურეთის რაიონის მაჟორიტარობის კანდიდატი, ანა დოლიძე, თბილისის მთავარ სამმართველოში გამოკითხვაზე დაიბარეს.

როგორც მან On.ge-სთან საუბარში განაცხადა, საქმე ეხება ჯგუფების მხრიდან გინებისა და მუქარის ფაქტებს, რომელიც წერეთლის 105 ნომერში მოხდა.

ანა დოლიძე ამბობს იმასაც, რომ 2 კვირაა ამ მუქარის შესახებ საუბრობს, თუმცა გამოხმაურება მას შემდეგ მოყვა, რაც დაიმუქრა, რომ საერთაშორისო ორგანიზაციებს მიმართავდა.

დიდუბე-ჩუღურეთის რაიონის მაჟორიტარი დეპუტატობის კანდიდატი, ანა დოლიძე აცხადებდა, რომ საარჩევნო კამპანიის წარმართვაში ხელს უშლიან და მოუწოდებდა NGO-ებსა და საერთაშორისო ორგანიზაციებს, დაინტერესებულიყვნენ საქართველოში არსებული საარჩევნო გარემოთი.

მაჟორიტარობის კანდიდატის განცხადებით, მას და მის მხარდამჭერებს თბილისში, წერეთლის გამზირზე ერთ-ერთი შეხვედრისას სიტყვიერი შეურაცხყოფა მიაყენეს. კერძოდ, მისი თქმით, თავს დაესხნენ ალკოჰოლური ან ნარკოტიკული ზემოქმედების ქვეშ მყოფი პირები, რომლებიც სექსისტურ გამონათქვამებს იყენებდნენ და მათ ტერიტორიის დატოვებასაც აიძულებდნენ.