საქართველოს პარლამენტის წევრი, ღიად პრორუსული პარტიის ლიდერი, ირმა ინაშვილი ფიქრობს, რომ კითხვა პუტინისა და მედვედევის მიერ საქართველოში ჩადენილ სამხედრო დანაშაულებებზე, პროვოკაციულია.

"ძალიან რთული პროცესები გაიარა ჩვენმა ქვეყანამ, დანაშაული თქვენ რაზეც ახლა მე მეკითხებით, დანაშაული ამ ქვეყნის წინაშე ჩაბარებული აქ იმ ხალხს, ვინც ეს ქვეყანა ვერ დაიცვა და ჩვენი მიწების 22 პროცენტი ჩააბარა მოწინააღმდეგეს. მე ჩემმა რა გააკეთა ის მაინტერესებს, სხვა რას გაგიკეთებს, თქვენ იმაზე რატომ მთხოვთ პასუხს? [...] ეს არის პროვოკაციული შეკითხვა, მე ჩემმა ხელისუფლებამ რა გააკეთა ჯერ ეს მაინტერესებს", — აცხადებს ინაშვილი ტვ პირველის ეთერში.

ამის შემდეგ, მან ოკუპანტი ქვეყნის პრეზიდენტი მაღალი კლასის პოლიტიკოსად მოიხსენია და აღნიშნა, რომ ამას მსოფლიოს ყველა პოლიტიკური ლიდერიც აღიარებს.

ირმა ინაშვილი და მისი პოლიტიკური პარტია ღიად გამოხატავენ ოკუპანტ ქვეყანასთან თანამშრომლობის სურვილს. მათი აზრით, ოკუპირებული ტერიტორიების საკითხზე საქართველოს უშუალო კომუნიკაცია უნდა ჰქონდეს რუსეთთან. ამავდროულად, პატრიოტთა ალიანსი ანტიდასავლურ მოწოდებებს აჟღერებს და ნატოში გაწევრიანებას ეწინააღმდეგება, ისინი ებრძვიან დასავლურ ინსტიტუტებსაც.

ინაშვილი თანაგუნდელებთან ერთად აგვისტოს ომის შემდეგ მოსკოვშიც იმყოფებოდა და რუსეთის დუმის დეპუტატებს შეხვდა. რამდენიმე დღის წინ კი ოკუპირებულ აფხაზეთშიც ჩავიდა და დე ფაქტო პრეზიდენტის მრჩეველს შეხვდა. ინაშვილი ამტკიცებს, რომ ოკუპირებულ რეგიონში პილიგრიმული მიზნებით იმყოფებოდა და ამას პოლიტიკური მოტივი არ ჰქონია. ცენტრ დოსიეს გამოძიების მიხედვით, პატრიოტთა ალიანსი წინასაარჩევნოდ კრემლიდან ფინანსდება. პარტიაში ამასაც უარყოფენ.

გაიგეთ მეტი: