ქართული ოცნების ერთ-ერთი ლიდერის, მამუკა მდინარაძის თქმით, მმართველი ძალის პოზიციები რუსეთთან მიმართებით ხისტი და პრაგმატულია და გადახედვას არ საჭიროებს. ასე უპასუხა მან პატრიოტთა ალიანსის ოკუპირებულ რეგიონში ვიზიტისა და რუსეთთან კავშირების შესახებ დასმულ კითხვას.

"ჩემთვის და ჩემი გუნდისთვის წითელი ხაზები ნიშნავს იმას, რომ ოკუპანტთან დაკავშირებით არანაირი პოზიცია არ გადაიხედება, აქ ვართ ძალიან პრაგმატულები და ხისტები. ჩვენ ვიცით ვინ ვინ არის. მტერს ჰქვია მტერი და ამ სიტყვის გადახედვაც კი არ იგეგმება არასდროს", — განაცხადა მდინარაძემ.

რაც შეეხება ჟურნალისტის კითხვას პატრიოტთა ალიანსის აფხაზეთში ვიზიტისა და ამავე პარტიის რუსეთთან კავშირების შესახებ, მამუკა მდინარაძე ამბობს, რომ ნებისმიერი საკითხი, რომელიც "წითელ ხაზებთან იქნება დაკავშირებული" არის სახიფათო და დამაზიანებელი.

მისივე თქმით, პრორუსებთან ერთად, არ უნდა დავივიწყოთ ის ხალხიც, რომელიც დეკლარირებულია როგორც პროდასავლური ძალა და "სინამდვილეში აკეთებენ რუსულ საქმეს". მან სადემონსტრაციოდ ახსენა "ოკუპანტ რუსეთისთვის მიყიდული სტრატეგიული ობიექტები", "რეზოლუცია, რითაც ქართველ სამხედროებს ომიდან 2 თვეში ომის დაწყება დააბრალეს, "საქართველოს მხარდაჭერა რუსეთის მსოფლიო სავაჭრო ორგანიზაციაში შესვლაზე", რითაც ხაზი გაუსვა ოპოზიციის "პრორუსულ პოლიტიკას".