სამოქალაქო ავიაციის სააგენტოს ინფორმაციით, საქართველოში პირველად, უპილოტო საფრენი ხომალდების სპეციფიკურ კატეგორიაში ფრენის ნებართვა კოპტერმა მიიღო.

"უპილოტო საჰაერო ხომალდების ოპერატორ კომპანია კოპტერ-ს სპეციფიკურ კატეგორიაში ექსპლუატაციის უფლება მიენიჭა. საქართველოს სამოქალაქო ავიაციის სააგენტოს მიერ, შპს კოპტერ.ჯი-ზე სპეციფიკურ კატეგორიაში ექსპლუატაციაზე თანხმობის სერტიფიკატი გაიცა. კომპანიას კუთვნილი უპილოტო საჰაერო ხომალდებით საქართველოს ტერიტორიაზე შემდეგი სამუშაოების განხორციელების უფლება მიენიჭა: დისტანციურად მართვადი საჰაერო ხომალდების: Mavic 2 Pro, Phantom 4 Pro+, Phantom 4 RTK, Phantom 4 Multispectral და Inspire 2 გამოყენებით, ფოტო-ვიდეო გადაღება; დისტანციურად მართვადი საჰაერო ხომალდის Matrice 200 v2 გამოყენებით, ფოტო-ვიდეო გადაღება და lidar-ის ტიპის ლაზერული სკანერების გამოყენება; დისტანციურად მართვადი საჰაერო ხომალდის Matrice 600 Pro გამოყენებით ფოტო-ვიდეო გადაღების და სპეციალური ტვირთის (თოკი - მაქსიმალური წონა 6.5 კგ) დაკიდებით საავიაციო სამუშაოების განხორციელება; დისტანციურად მართვადი საჰაერო ხომალდის Agras MG-1P გამოყენებით სასოფლო-სამეურნეო ნაკვეთების დამტვერვა/შეწამვლითი საავიაციო სამუშაოების განხორციელება; სერტიფიკატის მოქმედების ვადა ერთი წელია და აღნიშნული პერიოდის ფარგლებში ოპერატორის მიერ ფრენების უსაფრთხოების მოთხოვნების დაცვაზე ზედამხედველობას სამოქალაქო ავაიციის სააგენტო განახორციელებს. კოპტერ.ჯი არის პირველი კომპანია საქართველოში, რომელსაც უპილოტო საჰაერო ხომალდების სპეციფიკურ კატეგორიაში ექსპლუატაციის ნებართვა მიენიჭა, რაც შესაძლებლობას მისცემს ოპერატორს აწარმოოს ისეთი ტიპის და სირთულის სამუშაოები, რომელიც არ არის დაშვებული ღია კატეგორიაში, აღნიშნული კი, ხელს შეუწყობს დისტანციურად მართვადი საჰაერო ხომალდებით მიღებული სერვისების განვითარებას საქართველოში...", — ნათქვამია განცხადებაში.

კოპტერი ფოტო-ვიდეო ფროდაქშენ კომპანიაა, რომელიც 2016 წელს დაფუძნდა და ერთ-ერთი პირველი იყო საქართველოში, ვინც დრონების გამოყენება დაიწყო აღნიშნული მიმართულებით. გარდა აერო გადაღებებისა, კოპტერი აქტიურად თანამშრომლობს სხვადასხვა კომპანიებთან და ეხმარება მათ დახვეწონ და განავითარონ თავიანთი სამუშაო პროცესები დრონების გამოყენებით, იქნება ეს სხვადასხვა შენობა-ნაგებობების/კერძო საკუთრების მონიტორნგი, აზომვითი სამუშაოები, ტვირთის გადატანა და სხვა.