ელჩების კონფერენციის შემდეგ, ჟურნალისტებთან საუბრისას ოცნების ხელისუფლების საგარეო საქმეთა მინისტრმა, მაკა ბოჭორიშვილმა განაცხადა, რომ ევროკომისია "საკუთარ გადაწყვეტილებებს ჩამორჩა", "საქართველოში დიპლომატიური პასპორტების მფლობელებს უვიზო მიმოსვლა დიდი ხნის წინ შეაჩერა და ევროკავშირის წევრი ქვეყნები გაურკვეველი მიზეზებით სწორედ ამ გადაწყვეტილებას მიუყვებიან".

ბოჭორიშვილის განცხადებით, მისთვის "გაურკვეველია", თუ რატომ მიიღო ევროკომისიამ ეს გადაწყვეტილება. მისივე თქმით, უვიზო მიმოსვლის შეჩერების გაფრთხილებით საქართველოს "აშანტაჟებენ".

"ევროკომისია საკუთარ გადაწყვეტილებებს ჩამორჩა. ევროკომისიამ დიპლომატიური პასპორტების მფლობელებისთვის უვიზო მიმოსვლა უკვე დიდი ხნის წინ შეაჩერა და ევროკავშირის რიგი წევრი ქვეყნები გაურკვეველი მიზეზებით სწორედ ამ გადაწყვეტილებას მიუყვებიან — სხვათა შორის, სამართლებრივი საფუძვლები კიდევ საკითხავია. შეთანხმება იქნა შეჩერებული დიპლომატიური პასპორტების მფლობელებისთვის. შესაბამისად, ამ გადაწყვეტილების არსებობის ფონზე კიდევ გამეორება და ასეთი მუქარა, გვიმყარებს იმ მოსაზრებას, რომ უვიზო მიმოსვლა საქართველოსთან გარკვეულ ძალებს სჭირდებათ ერთადერთი მიზნისთვის — აშანტაჟონ ჩვენი ქვეყანა," — განაცხადა მაკა ბოჭორიშვილმა.