"საქართველო არა მხოლოდ რეგიონშია მოწინავე, არამედ წინ უსწრებს EU-ს და NATO-ს წევრ სახელმწიფოებს", — განაცხადა ოცნების დანიშნულმა პრეზიდენტმა, მიხეილ ყაველაშვილმა "ელჩების კონფერენცია 2025"-ზე სიტყვით გამოსვლისას.

მისი თქმით, საქართველო იცავს სუვერენიტეტს, საკუთარ სახელმწიფო ინტერესებსა და მშვიდობას თავისი ხალხისთვის.

"ჩვენი პრინციპული პოზიციის გამო, რომ საქართველო იცავს სუვერენიტეტს, საკუთარ სახელმწიფო ინტერესებსა და მშვიდობას თავისი ხალხისთვის, ჩვენი ქვეყნის მისამართით მთელი რიგი დაუმსახურებელი ბრალდებები მოვისმინეთ. მოგვიწია გავმკლავებოდით არაერთ გამოწვევას და დავპირისპირებოდით იმ მასშტაბურ კამპანიებს, რომლებიც საქართველოს და ქართველი ხალხის საუკეთესო ინტერესით ნამდვილად არ იყო ნაკარნახევი.

ამგვარი გამოწვევების ფონზეც კი, სხვადასხვა ინსტიტუტებისა და ორგანიზაციების მიერ ჩატარებული კვლევები და ანგარიშები ადასტურებს, რომ თვლად და ობიექტურ მონაცემებზე დაყრდნობით, მთელი რიგი მიმართულებებით, საქართველო არა მხოლოდ რეგიონშია მოწინავე, არამედ წინ უსწრებს ევროკავშირისა და NATO-ს წევრ სახელმწიფოებს", — აღნიშნა მიხეილ ყაველაშვილმა.

მისივე თქმით, "ვიზიტებმა მეზობელ ქვეყნებში — აზერბაიჯანში, სომხეთსა და თურქეთში, შემდეგ გაეროსა და სერბეთში ნათლად დამანახა, რომ ჩვენი საგარეო პოლიტიკური ვექტორი უალტერნატივოა".

"ჩემმა ვიზიტებმა მეზობელ ქვეყნებში — აზერბაიჯანში, სომხეთსა და თურქეთში, შემდეგ გაეროსა და სერბეთში ნათლად დამანახა, რომ ჩვენი საგარეო პოლიტიკური ვექტორი უალტერნატივოა. ჩვენთვის ამოსავალ წერტილად რჩება რეგიონული და გლობალური მშვიდობის განმტკიცება და თანასწორობაზე, ურთიერთპატივისცემაზე და ეროვნული ინტერესების გათვალისწინებაზე დამყარებული ღია დიალოგი, პარალელურად ჩვენი საგარეო პოლიტიკის უმნიშვნელოვანესი პრიორიტეტი 2 მნიშვნელოვანი ისტორიული რეგიონის დეოკუპაცია და არაღიარების პოლიტიკაა. ამავდროულად ვადასტურებთ ჩვენს ერთგულებას იმ მიდგომის მიმართ, რომლის თანახმადაც კონფლიქტის მშვიდობიან მოგვარებას უწყობს ხელს", — განაცხადა ელჩების კონფერენციაზე "ოცნების" დანიშნულმა პრეზიდენტმა, მიხეილ ყაველაშვილმა.