17 წლის ასაკის ჩათვლით ბავშვებისთვის განკუთვნილი 200-ლარიანი დახმარება საბანკო დავალიანების მქონე პირებს არ ჩამოეჭრებათ. როგორც მთავრობის ადმინისტრაციის პრესრელიზშია აღნიშნიშნული, ამაზე კომერციული ბანკების ხელმძღვანელები შეთანხმდნენ. დახმარების ჩარიცხვა 1-ლი სექტემბრიდან დაიწყება

შეთანხმების შესაბამისად, თუ დახმარების ბენეფიციარს ბანკთან აქვს სასესხო ვალდებულება, მის დასაფარად, ბანკი კონკრეტულად აღნიშნულ სოციალურ დახმარებას არ მიმართავს. ამ საკითხთან დაკავშირებით ბანკებმა შესაბამის საოპერაციო დონეზე მუშაობა უკვე დაიწყეს.

შეხვედრაში საქართველოს ფინანსთა მინისტრი ივანე მაჭავარიანი, პრემიერ-მინისტრის მრჩეველი ეკონომიკურ საკითხებში ბექა ლილუაშვილი, ლიბერთი ბანკის გენერალური დირექტორი ვასილ ხოდელი, საქართველოს ბანკის გენერალური დირექტორი არჩილ გაჩეჩილაძე და თიბისი ბანკის გენერალური დირექტორი ვახტანგ ბუცხრიკიძე მონაწილეობდნენ.

როგორც მთავრობის ადმინისტრაციაში ამბობენ, ერთჯერადი 200-ლარიანი სოციალური დახმარების მიღების მიზნით შექმნილ სპეციალურ პორტალზე — daxmareba.moh.gov.ge — დღეის მდგომარეობით რეგისტრირებულია 742 000 ბავშვი და 442 000 მშობელი. სისტემაში რეგისტრაცია 2020 წლის 1-ელ დეკემბრამდე გრძელდება.