დიდუბე-ჩუღურეთის რაიონის მაჟორიტარი დეპუტატობის კანდიდატი, ანა დოლიძე აცხადებს, რომ საარჩევნო კამპანიის წარმართვაში ხელს უშლიან და მოუწოდებს NGO-ებსა და საერთაშორისო ორგანიზაციებს, დაინტერესდნენ საქართველოში არსებული საარჩევნო გარემოთი. დოლიძის განცხადებით, მათ რეაგირება უნდა მოახდინონ ყველა იმ კანონდარღვევაზე, რომელიც საარჩევნო კამპანიის დემოკრატიული გარემოში ჩატარებას ზღუდავს.

მაჟორიტარობის კანდიდატი აცხადებს, რომ თბილისში, წერეთლის გამზირზე ერთ-ერთი შეხვედრისას, მას და მის მხარდამჭერებს სიტყვიერი შეურაცხყოფა მიაყენეს. კერძოდ, მისი თქმით, თავს დაესხნენ ალკოჰოლური ან ნარკოტიკული ზემოქმედების ქვეშ მყოფი პირები, რომლებიც სექსისტურ გამონათქვამებს იყენებდნენ და მათ ტერიტორიის დატოვებასაც აიძულებდნენ.

"კარგად ორგანიზებული კანონგარეშე მყოფი ჯგუფები მოდიოდნენ ჩვენთან და გვეუბნებოდნენ, რომ არ მოგვცემდნენ უფლებას გავსაუბრებოდით ხალხს. რაც უფრო საზარელია, უბნებში შექმნილი "შიშის ზონები" აშინებენ მეზობლებს, რომლებიც გაბედავენ მმართველი გუნდის გარდა, სხვა კანდიდატთან დალაპარაკებას", — წერს დოლიძე.

On.ge-სთან საუბრისას დოლიძე განმარტავს, რომ "ქუჩის სისტემა" და მასში ჩართული პირები, რომლებიც კამპანიის წარმართვაში ხელს უშლიან, პრობლემურია. მისი თქმით, აღნიშნულთან დაკავშრებით შსს-სთვის არ მიუმართავს, რადგან საჯაროდ განაცხადა და დაინტერესების შემთხვევაში, უწყება თავადაც დაიწყებდა გამოძიებას.

"სხვა უწყებებს აქვთ ვალდებულება, რახან ეს ინფორმაცია უკვე საჯარო სივრცეშია, თუ აქვთ ინტერესი, ეს ფაქტი კონკრეტულად გამოიძიონ", — აცხადებს ის.

დოლიძის განმარტებით, არასამთავრობო და საერთაშორისო ორგანიზაციების რეაგირება ერთადერთი გზაა, რომ "ხელისუფლებამ ვეღარ შეძლოს საკუთარი, უკანონო მეთოდებით არჩევნების ჩატარება და ძალაუფლების შენარჩუნება".