ოკუპირებული აფხაზეთის დე ფაქტო ჯანდაცვის სამინისტროს ცნობით, ოჩამჩირის სოფელ ლაბრაში კორონავირუსისგან 52 წლის კაცი გარდაიცვალა. მათივე ინფორმაციით, პაციენტმა ოჩამჩირეს სამედიცინო დაწესებულებას 23 აგვისტოს მიმართა.

დე ფაქტო უწყების განცხადებით, მანამდე ის სახლში სიცხისდამწევი პრეპარატებით თვითნებურად მკურნალობდა.

"პაციენტის სიმპტომების გაცნობის შემდეგ მივიღეთ გადაწყვეტილება მისი გუდაუთის კოვიდინფიცირებულთა საავადმყოფოში გადაყვანის შესახებ, თუმცა პაციენტის მდგომარეობა უფრო მეტად გაუარესდა და მიუხედავად გატარებული ინტენსიური ღონისძიებებისა, მისი გადარჩენა ვერ მოახერხეთ", — განაცხადა ოჩამჩირის რაიონული საავადმყოფოს მთავარმა ექიმმა, მადონა ქიშმარიამ.

სოფელ ლაბრაში ბოლო პერიოდში ეს COVID – 19-ის გამოვლენის მეხუთე შემთხვევაა. ამიტომ, დე ფაქტო ჯანდაცვის უწყებამ სოფელში 14 დღიანი კარანტინის დაწესების გადაწყვეტილება მიიღეს. სოფლის მოსახლეობის ნაწილს კორონავირუსზე ტესტი აუღეს. დე ფაქტო ჯანდაცვის სამინისტროს ცნობით, ჯამში ამ დრომდე სოფელში 12 კოვიდინფიცირების შემთხვევა გამოვლინდა.

მათივე ინფორმაციით, 24 აგვისტოს მონაცემებით, აფხაზეთში კორონავირუსით 247 ადამიანი დაინფიცირდა, მათ შორის 101 გამოჯანმრთელდა, გარდაიცვალა — 4.