ჩემპიონთა ლიგის დასრულების შემდეგ პარიზში არეულობების გამო 150-მდე ადამიანი დააკავეს. ამის შესახებ Euronews იტყობინება. მედიის ცნობით, დაკავების მიზეზი ძალადობა და სხვადასხვა საგნების უმისამართო სროლა იყო.

პარიზის ქუჩებში არეულობა მოჰყვა ჩემპიონთა ლიგის გუშინდელ შედეგს, რის მიხედვითაც პარი სენ ჟერმენის საფეხბურთო კლუბმა მიუნხენის ბაიერნთან ფინალი წააგო. გულშემატკივრებმა მაღაზიების დარბევა და მანქანების დაზიანება დაიწყეს. პოლიციამ ცრემლსადენი გაზიც გამოიყენა.

გარდა ამისა, როგორც პარიზის პოლიციაში ამბობენ, მოსახლეობა გაფრთხილებული იყო, რომ საჯარო თავშეყრის ადგილას ნიღბები ეტარებინათ და სოციალური დისტანცირება შეენარჩუნებინათ, რაც არ გაითვალისწინეს. ამის გამო, პოლიცია მატჩის მიმდინარეობისას სპეცრაზმის თანხლებით რამედნიმე ბარში შეიჭრა და სპეციალური ნორმების დარღვევის გამო ადამიანები დააკავა.

ასევე, მიუხედავად იმისა, რომ ერთ-ერთი სტადიონზე, დიდ ეკრანებზე ფეხბურთის საყურებლად მხოლოდ 5 000 ადამიანი დაიშვებოდა, მატჩის დაწყებამდე რამდენიმე წუთით ადრე კვლავ შესვლის მსურველთა რიგი იდგა.

ჩემპიონატთან დაკავშირებული შესაძლო გართულებების თავიდან ასაცილებლად ჩაკეტილი იყო 17 მეტრო და მატარებლის სადგური. გადაკეტილი იყო სამზოლიანი გზის შესასვლელი ზოლი. გამზირი, სადაც დიდ ეკრანებზე ფეხბურთის ყურება იგეგმებოდა, ჩაკეტილი იყო და მხოლოდ ფეხით მოსიარულეთათვის იყო ნებადართული. მობილიზებული იყო 3 000-მდე პოლიციელი. მიუხედავად წინასწარი მზადებისა, ჩემპიონთა ლიგის დაწყებამდე და დასრულების შემდეგაც არეულობა მაინც მოჰყვა.