ამერიკის შეერთებული შტატების ელჩი საქართველოში, კელი დეგნანი, აცხადებს, რომ რუსეთმა აუცილებლად უნდა გააუქმოს საქართველოსთან ავიამიმოსვლაზე აკრძალვა.

"ურთიერთობის ნორმალიზებისთვის საუკეთესო გზა რუსეთისთვის ავიამიმოსვლაზე აკრძალვის გაუქმებაა და არა ლოდინი და ლაპარაკი. მან უნდა გააუქმოს ეს აკრძალვა. ამის შემდეგ საქართველოში უფრო მარტივი იქნება, ნდობა ჰქონდეს, რომ რუსეთი, სერიოზულადაა განწყობილი იმის მიმართ, რასაც ამბობს", — განაცხადა კელი დეგნანმა.

კელი დეგნანი ამ განცხადებით ლავროვის პოზიციას გამოეხმაურა, რომელმაც განაცხადა, რომ ყურადღებით აკვირდებიან საქართველოში ეპიდემიოლოგიური სიტუაციის ნორმალიზებას და მიიჩნევენ, რომ ფრენების აღდგენა უახლოესი მომავლის საკითხია.

რუსეთმა საქართველოს ე.წ. ტურისტული ემბარგო 8 ივლისიდან, 20 ივნისის მოვლენების შემდეგ დაუწესა. ამ დღეს მოქალაქეების პროტესტი საქართველოში რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რამაც ოპოზიციისა და სამოქალაქო სექტორის პროტესტი გამოიწვია. ოპოზიციის დეპუტატები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.