რუსული პროსახელისუფლებო გამოცემა რია ნოვოსტის ცნობით, რუსეთის საგარეო საქმეთა მინისტრი საქართველოსთან ავიამიმოსვლოს განახლების იმედს გამოთქვამს. ლავროვის განცხადებით, ეს უახლოესი მომავლის საკითხია.

"ყურადღებით ვაკვირდებით საქართველოში არსებულ მდგომარეობას. რა თქმა უნდა, საერთო ეპიდემიოლოგიური სიტუაციის ნორმალიზებას ველოდებით, როგორც რეგიონში, ასევე, მსოფლიოში, რეგულარული ავიარეისების გასაახლებლად სხვადასხვა მიმართულებით", — განაცხადა ლავროვმა გაზეთ ტრუდთან ინტერვიუში.

რუსეთმა საქართველოს ე.წ. ტურისტული ემბარგო 8 ივლისიდან, 20 ივნისის მოვლენების შემდეგ დაუწესა. ამ დღეს საქართველოში მოქალაქეების პროტესტი საქართველოში რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. გავრილოვის მიერ სკამის დაკავებას საპროტესტო ტალღა მოჰყვა.