გიორგი შაქარაშვილის საქმის ადვოკატები მცხეთის რაიონულს სასამართლოში სამუშაო პირებების არარსებობაზე საუბრობენ. ისინი ინვენტარს, კერძოდ მაგიდასა და დენის წყაროს ითხოვენ. მათი თქმით, არსებული პირობების გამო ხელი ეშლებათ ბრალდებულების სრულყოფილად დაცვაში.

"სასამართლოს მიერ შეგნებულად მინდინარეობს ადვოკატების დისკრედიტაცია, ადვოკატებს არ გვაქვს უფლება, ვისარგებლოთ სრულფასოვნად ჩვენი უფლებებით, რომ სრულყოფილად დავიცვათ ჩვენი დაცვის ქვეშ მყოფთა ინტერესები. კერძოდ, მცხეთის რაიონულ სასამართლოში ადვოკატებს არ გვაქ ელემენტარული ინვენტარი, მაგიდები არ გვაქვს, არ გვაქვს დენის წყარო რომ ვისარგებლოთ კომპიუტერით, ვინაიდან საქმე არის მოცულობითი, დაახლოებით 2 000 გვერდიანი, მატერიალური სახით მათი მოტანის შემთხვევაში ხელში უნდა გვეჭიროს ორი ათასი ფურცელი და ისე დავესწროთ სასამართლო სხდომებს", — განაცხადა როსტომ კერესელიძემ.

ადვოკატები მოუწოდებენ იუსტიციის უმაღლეს საბჭოსა და იუსტიციის მინისტრს, რომ მცხეთის რაიონულ სასამართლოს გამოუყონ ხუთი მაგიდა.

"ადვოკატები ვართ არათანაბარ პირობებში პროკურატურასთან, შესაძლებელია ჩვენ გამოვხატოთ პროტესტი და არ დავესწროთ სასამართლო სხდომებს", — განაცხადეს მათ.

მცხეთის რაიონულ სასმამართლოში ამ წუთებში სხდომა მიმდინარეობს. დღეს, 21 აგვისტოს აგარაკზე შეკრებილ მოწმეებს გამოკითხავენ.