რუსეთის ელჩმა გაეროში, ვიტალი ჩურკინმა გაეროში უსაფრთხოების სამიტზე განაცხადა, ცნობებს ალეპოში უდანაშაულო ქალებისა და ბავშვების მკვლელობის შესახებ, სჭირდება დადასტურება, რადგან არის შემთხვევები, როცა ვრცელდება ყალბი ამბები მათ შესახებ.

ვიტალი ჩურკინმა აღნიშნულთან დაკავშირებით მას შემდეგ ისაუბრა, რაც მას კითხვა დაუსვეს სირიაში მიმდინარე მოვლენებზე:

"მე ნანახი მაქვს და დარწმუნებული ვარ, თქვენც იცით, თუ როგორ იქმნება ზოგი ასეთი ყალბი ამბავი და ბავშვებს როგორ აყრიან მტვერს, რომ ისინი წარმოაჩინონ დაბომბვის მსხვერპლად. ეს შემაძრწუნებელი ცნობებია, თუმცა მათ სჭირდებათ დადასტურება. ჩემს პრაქტიკაში, გაცილებით მშვიდობიან პერიოდში, 1990-იან წლებში, ვრცელდებოდა დეზინფორმაცია, რათა შექმნილიყო გარკვეული ფსიქოლოგიური კლიმატი. ჩვენ არაერთხელ ვნახეთ მსგავსი რამ სირიის შემთხვევაშიც"

CNN-ის ინფორმაციით, ალეპოში ყველას კლავენ, ვინც აჯანყებულებთან კავშირშია - მათ შორის ბავშვებს და ქალებს.

ალეპოში ბავშვებისა და ქალების დახოცვას ადასტურებს გაეროც.

რუსეთმა სირიის ტერიტორიაზე საჰაერო დაბომბვები ე.წ. ისლამური სახელმწიფოს მებრძოლების წინააღმდეგ 2015 წლის 30 სექტემბერს დაიწყო, 16 აგვისტოს კი ალეპოს დაბომბვა ირანის ბაზების გამოყენებით განაახლა. ომს უამრავი მშვიდობიანი მოსახლე, მათ შორის ბავშვები, ემსხვერპლა.

რა ხდება სირიაში? - იხილეთ On.ge-ს მომზადებული მასალა სირიის ომის შესახებ.

შესწორება: ნიუსის თავდაპირველი სათაური გამოიყურებოდა შემდეგნაირად: "რუსეთის ელჩი გაეროში: ალეპოში ბავშვებს მტვერს აყრიან, რომ მსხვერპლებად გაასაღონ". აღნიშნული ფრაზა აღმოჩნდა კონტექსტიდან ამოგლეჯილი. ის დაიწერა ამერიკელი ჟურნალისტის, სემუელ ოკფორდის მიერ გამოქვეყნებულ ციტატაზე დაყრდნობით. სემუელ ოკფორდი არაერთი გავლენიანი მედიასაშუალების ჟურნალისტია. მოგვიანებით, ვიტალი ჩურკინის ეს ფრაზა დაზუსტდა.