მცხეთაში, არაგვის ხიდთან გიორგი შაქარაშვილის გარდაცვალების საქმეზე საგამოძიებო ექსპერიმენტი ჩატარდა. ბრალდებულების, არჩილ გაგნიძისა და ვასილ მახარაძის ადვოკატებმა პროკურატურის მიერ გავრცელებული ვერსიის რამდენიმე ეპიზოდი გაითამაშეს. ადვოკატების მტკიცებით, პროკურატურის ვერსია და მოწმის ჩვენება არის ტყუილი.

"ჩავატარეთ 6 საგამოძიებო ექსპერიმენტი. ყველა ექსპერიმენტში დადგინდა, რომ პროკურატურის ვერსია პირის ბრალდების შესახებ დადგენილებაში, არის სიცრუე და არ შეესაბამება სინამდვილეს. აქედან გამომდინარე, ჩვენ კვლავ გავაგრძელებთ საგამოძიებო ექსპერიმენტების ჩატარებას. ვაპირებთ, რომ სხვადასხვა პირი გამოვკითხოთ აღნიშნულ საკითხთან დაკავშირებით და უფრო მეტად წარმოვაჩინოთ ის რეალური მხარე და ის რეალობა, რაც აღნიშნულ საქმეში არსებობს", — აცხადებს კობაიძე.

გაგნიძის მეორე ადვოკატის, ვასილ მამულაშვილის მტკიცებით, ექსპერიმენტებით დადგინა, რომ ბუნებრივი განათების პირობებში ხიდზე არათუ პიროვნებების, არამედ სილუეტების დანახვაც კი შეუძლებელი იყო.

"ჩავატარეთ ექსპერიმენტი იაკობ ბრეგვაძის იმ შესაძლო ჩვენებასთან დაკავშირებით, რომელსაც ჩვენ არჩილ გაგნიძის ადვოკატები არ ვიცნობთ. ეს არის 2 აგვისტოს ჩვენება, სადაც იგი თითქოსდა მიუთითებს, ესეთი ინფორმაცია გვაქვს, რომ ხიდის დასრულებამდე დაინახა ორი პიროვნება, რომელიც მტკიცებით ფორმაში აღნიშნა, რომ არ არიან ის პირები, რომლებიც მასთან ერთად იმყოფებოდნენ. ჩვენ აღნიშნულთან დაკავშირებით ორი ექსპერიმენტი ჩავატარეთ და დადასტურდა, რომ ფიზიკურად შეუძლებელია ბუნებრივი განათების პირობებში, რა განათებაც ჩვენ გვქონდა, რაიმე დაენახა, არათუ პიროვნებები არამედ ზოგადად სილუეტებიც კი", — ამბობს ვასილ მამულაშვილი.

არჩილ გაგნიძის მესამე ადვოკატის, ბექა ნემსიწვერიძის განმარტებით, "დადასტურდა, რომ ბრეგვაძის მიერ 20 ივნისს მიცემული ჩვენება არის არასწორი და ტყუილი".

"ექსპერიმენტით გამოირიცხა იმის შესაძლებლობა, რომ შენობიდან ვინმეს შეეძლო დაენახა კონკრეტული პირების გადაადგილება ხიდზე და მით უმეტეს ამ პირების იდენტიფიცირება", — ამბობს ადვოკატი.

აგრეთვე, ადვოკატებმა არ აღადგინეს პროკურატურის მიერ შემოთავაზებული ხევში ჩასვლის ეპიზოდი და აღნიშნეს, რომ არსებული ხილვადობის პირობებში ექსპერიმენტში მონაწილე პირებს საფრთხეს ვერ შეუქმნიდნენ.

შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს — ნ.ც-ს; ლ.შ-ს; ნ.ქ-ს და გ.მ-ს გამოძიება ედავება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას. ხოლო მათგან ორს — ზ.ხ-ს და ა.ქ-ს გარდა ამ მუხლებისა, გამოძიება ედავება განზრახ ჯგუფურად ჩადენილ მკვლელობას.

პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.