დღეს, 18 აგვისტოს ჯანდაცვის სამინისტროსთან, დაკავებული ექიმის, ვახტანგ ყიფიანის საქმესთან დაკავშირებით ექიმების აქცია გაიმართა. აქციაზე შეკრებილნი იყვნენ 33 სამედიცინო ასოციაციის ექიმები და ვახტანგ ყიფიანის წინასწარ პატიმრობაში დატოვებას აპროტესტებდნენ.

საქართველოს სამედიცინო ასოციაციების გაერთიანების წარმომადგენლის თქმით, სოლიდარობას უცხადებენ დაკავებულ კოლეგას და მოითხოვენ მის გათავისუფლებას. ექიმების განცხადებით, რეგულირების სააგენტოს აქტი, რომლითაც პროკურატურა ხელმძღვანელობს, არ პასუხობს თანამედროვე მედიცინის მოთხოვნებს და მის გადახედვას ითხოვენ.

"მოთხოვნა არის ერთი, ვახტანგ ყიფიანის წინასწარი პატიმრობიდან გათავისუფლება, ანუ პროკურატურამ უნდა გააუქმოს პატიმრობის მოთხოვნა. მეორე, რეგულირების სააგენტოს აქტი, რომლითაც ხელმძღვანელობს პროკურატურა, უნდა იქნეს გადახედილი და უნდა მოხდეს მისი თავიდან შესწავლა", — აცხადებს სამედიცინო ასოციაციების გაერთიანების წარმომადგენელი.

ექიმების განცხადებით, საკანონმდებლო დონეზე, რეგულირების სააგენტოსა და მინისტრის შესაბამის ბრძანებაში საჭიროა ცვლილებები. ამ ცვლილებების საჭიროებაზე ჯანდაცვის მინისტრმა, ეკატერინე ტიკარაძემაც ისაუბრა 10 აგვისტოს, ექიმებთან შეხვედრის შემდეგ.

"ცალსახად გამოიკვეთა, თუ რამდენი და რა მნიშვნელოვანი ცვლილებები არის საჭირო განხორციელდეს საკანონმდებლო ბაზაში და ასევე რეგულირების და პროფესიული კომპეტენციების ნუსხაში, იმისათვის, რომ ვახტანგ ყიფიანი იყოს ბოლო ექიმი, რომელიც მოხვდა იმ გარკვეულ გაუგებრობაში, სადაც მას დღესდღეობით ეწოდა თაღლითი ექიმის სახელი", — განაცხადა ტიკარაძემ ექიმებთან შეხვედრის შემდეგ.

სამედიცინო ასოციაციის გაერთიანების წარმომადგენლის თქმით, ჯანდაცვის მინისტრის ეს განცხადება პროკურატურამ უნდა გაითვალისწინოს და აღკვეთი ღონისძიების მოთხოვნა უნდა შეცვალოს.

4 აგვისტოს პროკურატურამ გაავრცელა ინფორმაცია თბილისის ცენტრალური საავადმყოფოს დირექტორისა და ექიმების დაკავების შესახებ. უწყების ცნობით, კლინიკის ექიმმა პაციენტი დაარწმუნა, რომ ქირურგიულ ოპერაციას იტალიიდან მოწვეული ექიმები ჩაუტარებდნენ, თუმცა ოპერაცია, შესაბამისი ლიცენზიის გარეშე, თავად გაუკეთა. უწყების ინფორმაციით, ყიფიანმა ოპერაციაზე დაიხმარა მაგდა ხოჭოლავა, "რომელსაც ასევე არ გააჩნდა სახელმწიფო და/ან დროებითი სერტიფიკატი არც ერთ სპეციალობაში და იგი საავადმყოფოში ხელშეკრულების საფუძველზე კონსულტანტის თანამდებობაზე მუშაობდა". პროკურატურის ინფორმაციით, ოპერაციის შემდეგ პაციენტი ამ დრომდე კომაშია.

10 აგვისტოს, ექიმებთან შეხვედრის შემდეგ ჯანდაცვის მინისტრმა განაცხადა, რომ სამინისტრო მზად არის, საკუთარი კომპეტენციის ფარგლებში ყველაფერი გააკეთოს, რათა ამ საქმეში სიცხადე შეიტანოს, რაც ვახტანგ ყიფიანის საქმეზე დადებით გავლენას იქონიებს.

"საკანონმდებლო ბაზა არ იყო მზად იმისთვის, რომ ჩვენ განგვეხორციელებინა ბატონი ვახტანგ ყიფიანის კომპეტენციების ფარგლებში ის პროგრესული და თანამედროვე ჩარევა, რომელიც მან განახორციელა. მნიშვნელოვანია, რომ უმოკლეს ვადაში მომზადდეს ეს რეგულაცია იმისათვის, რომ სხვა ექიმებიც არ აღმოჩნდნენ მსგავს ვითარებაში", — აღნიშნა ტიკარაძემ.

ექიმები და კლინიკა ბრალს უარყოფენ. თბილისის საქალაქო სასამართლოს გადაწყვეტილებით, გიორგი ლობჟანიძეს, ანუ ცენტრალური საავადმყოფოს დირექტორს, მოსამართლემ 100 000-ლარიანი გირაო შეუფარდა, ხოჭოლავას და ყიფიანს კი — წინასწარი პატიმრობა. გამომდინარე იქიდან, რომ ხოჭოლავა საქართველოში არ იმყოფება, მას წინასწარი პატიმრობა დაუსწრებლად შეეფარდა.