ამერიკის საგამოძიებო სამსახურის ოფიციალურ პირებს უკვე მტკიცედ სჯერათ, რომ რუსეთის პრეზიდენტი, ვლადიმერ პუტინი, აშშ-ს საპრეზიდენტო არჩევნებთან დაკავშირებით წარმოებულ რუსულ კამპანიაში, რომელმაც შედეგებზე გავლენა მოახდინა, პერსონალურად იყო ჩართული. ინფორმაციას NBC ავრცელებს.

ორმა ოფიციალურმა პირმა ამერიკულ მედია გამოცემას ანონიმურად განუცხადა, რომ პუტინმა პირადად წარმართა დემოკრატების ონლაინ მასალის უკანონოდ მოპოვებისა და გამოქვეყნების პროცესი. საგამოძიებო სამსახურმა ინფორმაცია დიპლომატიური წყაროებიდან და ჯაშუშებისგან მიიღო, რომლებიც ამერიკის მოკავშირეებთან მუშაობენ.

პუტინის მიზნები მრავალმხრივი იყო, მასში შედიოდა "ვენდეტა" ჰილარი კლინტონის წინააღმდეგ, რომელსაც უნდა ეჩვენებინა ამერიკული პოლიტიკის კორუფცია და შეექმნა იმიჯი, რომ აშშ მოკავშირე ქვეყნებისთვის აღარ იყო ნდობის მქონე ღირსეული ლიდერი.

CIA-ის საბოლოო შეფასებით, რუსეთის მთავრობას დონალდ ტრამპის პრეზიდენტად არჩევა სურდა. ამ მოსაზრებას FBI დაბეჯითებით არ ემხრობა, მაგრამ მათი ზოგიერთი წარმომადგენელი კამათობს, რომ ჰილარი კლინტონის კანდიდატურის იმიჯის შელახვა მისი იმეილების გატეხვითა და გამოაშკარავებით, რუსეთის ინტერესებიდან გამომდინარე იყო ორგანიზებული.

ამერიკელი ოფიციალური პირები აცხადებენ, რომ პუტინის სისტემა აკონტროლებს 85 მილიარდი დოლარის ღირებულების აქტივებს.

აღნიშნულზე ოფიციალური კომენტარი არ გაუკეთებიათ CIA-ისა და ეროვნული დაზვერვის წარმომადგენლებს.