ერთიანი ნაცინალური მოძრაობის ერთ-ერთი ლიდერი, სალომე სამადაშვილი აცხადებს, რომ მინსკის მიმართულებით შესრულებული ფრენის შესახებ საგარეო საქმეთა სამინისტროს მიერ გავრცელებულმა ინფორმაციამ არათუ არ მოხსნა კითხვები, არამედ პირიქით, უფრო გააჩინა. ამის შესახებ მან TV პირველის დღის ეთერში ისაუბრა.

"სრულიად გაუგებარია მაშინ, როდესაც ბელარუსში ფაქტობრივად იქმნება ისტორია და ყველაზე მნიშვნელოვანი მომენტია, საქართველოს ელჩი რას აკეთებდა არასამუშაო ადგილას, რატომ არ იმყოფებოდა იმ ქვეყანაში, სადაც წარმოადგენდა ჩვენს სახელმწიფოს. არ ვიცი, შვებულებაში იყო თუ გამოწვეული იყო, ამიტომ საგარეო საქმეთა სამინისტრომ უნდა წარმოადგინოს დოკუმენტაცია. არ აქვს ელჩს არანაირი უფლება, დატოვოს ადგილსამყოფელი ქვეყანა, თუ არ აქვს წინასწარ მიღებული ბრძანებით თანხმობა მინისტრისგან. ჩემთვის საინტერესო იქნება და აუცილებლად გამოვითხოვ შესაბამის ინფორმაციას საგარეო საქმეთა სამინისტროსგან", — განაცხადა სამადაშვილმა.

მას ასევე კითხვები აქვს იმასთან დაკავშირებით, რომ როცა მინსკში, მაგალითად, კიევიდან დღეში 5-6 რეისი ხორციელდება, საქართველოს მოსახლეობამ საკუთარი ჯიბიდან ათობით ათასი ლარი ელჩის მოგზაურობაში რატომ გადაიხადა. გარდა ამისა, სამადაშვილის თქმით, რომ მისთვის საერთოდ არ არის დამაჯერებელი ის ინფორმაცია, რომ რეისის მიზეზი ელჩი იყო.

"თუ ელჩი იყო, მით უმეტეს, ვალდებულია სახელმწიფო, რომ გაასაჯაროვოს ინფორმაცია, რადგან ეს არის საბიუჯეტო სახსრების გაფლანგვა. არადამაჯერებელია ოფიციალური ვერსია. ხალხის ჯიბიდან ამოღებული ფულით ბატონმა ზალკალიანმა თუ გადაწყვიტა, რომ თავისი ნათესავი კომფორტულად გაემგზავრებინა, ესეც ჩვენი საქმეა. ესეც საბიუჯეტო სახსრების არამიზნობრივი ხარჯვაა და სამინისტროს მოეთხოვება პასუხი. გვაქვს სრული უფლება, ვიცოდეთ, ვინ გადაკვეთა საზღვრები", — აღნიშნა სამადაშვილმა.

მისი თქმით, თუ ელჩი ზალკალიანის ნათესავია, გარდა საბიუჯეტო სახსრების არამიზნობრივი ხარჯვისა, ნეპოტიზმის ნიშნებიც იკვეთება და სამინისტრომ პასუხი ამ კითხვასაც უნდა გასცეს.

16 აგვისტოს სოციალურ ქსელში გავრცელდა ინფორმაცია, რომლის მიხედვით, მინსკის მიმართულებით თბილისიდან გაფრინდა სამთავრობო თვითმფრინავი, რომლითაც საქართველოს პრეზიდენტი, სალომე ზურაბიშვილი სარგებლობს.

პრეზიდენტის ადმინისტრაციაში On.ge-ს უთხრეს, რომ სალომე ზურაბიშვილი მინსკში არ ყოფილა. მეორე დღეს, 17 აგვისტოს განცხადება საქართველოს საგარეო საქმეთა სამინისტრომ გაავრცელა და თქვა, რომ ბელარუსში საქართველოდან ელჩი, ვალერი კვარაცხელია გაფრინდა, რომელიც საქართველოში 6 აგვისტოდან იმყოფებოდა. უწყების თქმით, ბოლო დღეებში ბელარუსში განვითარებული მოვლენების გამო საჭირო გახდა მისი მყისიერი დაბრუნება მინსკში.