შინაგან საქმეთა სამინისტროს ინფორმაციით, ბაუჰაუს ბარიდან დაკარგული ახალგაზრდა ქალის ცხედარი მტკვარში იპოვეს. ამ დრომდე გრძელდება საგამოძიებო და საძიებო სამუშაოები დაკარგულ ახალგაზრდა კაცზე.

უწყებაში ამბობენ, რომ ბაუჰაუს ბარიდან 2 ახალგაზრდის გაუჩინარების შესახებ შეტყობინება, 15 აგვისტოს დაახლოებით 21:00 საათზე შევიდა და ახალგაზრდების ადგილსამყოფელის დადგენის მიზნით, ინტენსიურ რეჟიმში დაიწყო შესაბამისი საძიებო ღონისძიებები.

"საქმეზე უკვე ჩატარდა სხვადასხვა სახის საგამოძიებო მოქმედებები, მათ შორის გამოკითხული არიან ბაუჰაუს ბარის თანამშრომლები, დაკარგული ახალგაზრდების ოჯახის წევრები, მეგობრები და საქმესთან შემხებლობაში მყოფი სხვა პირები", — აცხადებენ შსს-ში.

ფაქტთან დაკავშირებით გამოძიება 143-ე მუხლით მიმდინარეობს, რაც თავისუფლების უკანონო აღკვეთას გულისხმობს.