ოკუპირებული აფხაზეთის ე.წ. ჯანდაცვის სამინისტრო კორონავირუსით ინფიცირებული პაციენტების სამკურნალოდ მოხალისეებს ეძებს. დე ფაქტო უწყების ცნობით, გუდაუთის საავადმყოფოში, რომელიც კოვიდინფიცირებულ პაციენტებს ემსახურება, მედპერსონალი არ ჰყოფნით.

"მედიკოსებს დახმარება სჭირდებათ. ექიმები გაძლიერებულ რეჟიმში მუშაობენ, იღლებიან და ინფიცირდებიან. დღეს მედპერსონალი უბრალოდ არ გვყოფნის, რადგან დაავადებულთა რიცხვი საგრძნობლად გაიზარდა", — აცხადებენ დე ფაქტო უწყებაში.

არსებული ინფორმაციით, ოკუპირებულ აფხაზეთში ამ დროისათვის კორონავირუსით 189 ადამიანია ინფიცირებული. მათ შორის გამოჯანმრთელდა 69, გარდაიცვალა — 3. კოვიდინფიცირებულთა ნაწილი სამკურნალოდ საქართველოს მიერ კონტროლირებად ტერიტორიაზეც გადმოჰყავთ.